މަޖިލީހުގެ ދައުރުން ބޭރުން ބާއްވާ ފުރަތަމަ ޖަލްސާ މި މަހުގެ 16ގައި

ރައްޔިތުންގެ މަޖިލީހުގެ ދައުރުން ބޭރުން ބާއްވަން ނިންމާފައިވާ ފުރަތަމަ ޖަލްސާ މި މަހުގެ 16 ވަނަ ދުވަހުގެ ހެނދުނު 9:00 އަށް ތާވަލުކޮށްފިއެވެ.

މި ޖަލްސާގެ އެޖެންޑާގައި ހިމެނެނީ މަޖިލީހުގެ ރައީސްގެ މޭޒުން ހުށަހަޅާ ކަންކަމާއި، ކޮމިޓީތަކުން ހުށަހަޅާ ކަންކަމެވެ.

މަޖިލީހުގެ ރައީސްގެ މޭޒުން ހުށަހަޅާ ކަންކަމުގެ ތެރޭގައި ހިއުމަން ރައިޓްސް ކޮމިޝަންގެ ނައިބު ރައީސް އައްޔަނުކުރުމުގެ މައްސަލައާއި، ވަޒީރުންގެ މަޖިލީހަށް އައްޔަނުކުރި ހަތަރު ބޭފުޅުންގެ ނަންފުޅު ފާސްކުރުމުގެ މައްސަލަ ހިމެނެއެވެ. އަދި މޯލްޑިވްސް ބްރޯޑްކާސްޓިންގ ކޮމިޝަނަށް ދެ މެންބަރުން އައްޔަނުކުރުމުގެ މައްސަލަވެސް ހިމެނެއެވެ.

ކޮމިޓީތަކުން ހުށަހަޅާ ކަންކަމުގެ ތެރޭގައި މޯލްޑިވްސް ބްރޯޑްކާސްޓިންގ ކޮމިޝަނަށް ދެ މެންބަރުން އައްޔަނުކުރުމުގެ މައްސަލައާއި، އިލެކްޝަންސް ކޮމިޝަނަށް ދެ މެންބަރުން އައްޔަނުކުރުމުގެ މައްސަލަ ހިމެނެއެވެ.

އިލެކްޝަންސް ކޮމިޝަނުގެ ދެ މެންބަރެއްގެ މަޤާމު ހުސްވެފައިވަނީ އެ ކޮމިޝަނުގެ ކުރީގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފް ވަކިކުރުމަށް މަޖިލީހުން ފާސްކުރުމުންނެވެ. މި ދެ ބޭފުޅުންނާ މެދު ރިޔާސީ އިންތިޚާބުގެ ޑޭޓާބޭސް ވިއްކުމާއި ރީރެޖިސްޓްރޭޝަން އޮޅުވާލުން ފަދަ ބޮޑެތި ތުހުމަތުތަކެއް ކުރެވިފައިވެއެވެ.

އިލެކްޝަންސް ކޮމިޝަނުގެ މެންބަރު ކަމުގެ މަޤާމު ހުސްވާތާ 60 ދުވަހުގެ ތެރޭގައި އެ މަޤާމަށް މެންބަރަކު އައްޔަންކުރަން ޖެހޭއިރު، އަންނަ ދައުރު ނުފެށެނީސް އެ މުއްދަތު ހަމަވާނެއެވެ. އެހެންކަމުން މި މައްސަލަ ހައްލުކުރުމަށް ދައުރުން ބޭރުން މި ޖަލްސާ ބޭއްވުމަށް ވަނީ ނިންމާފައެވެ.