ހަސަން ލަތީފް އަނެއްކާ ވެސް އެމްޑީޕީ އަށް ސޮއި ކުރައްވައިފި

ދަ ޑިމޮކްރެޓްސްގެ ވަގުތީ ޗެއާޕާސަން ހަސަން ލަތީފު -

ދަ ޑިމޮކްރެޓްސްގެ ރައީސްކަމުގައި ހުންނެވި ހަސަން ލަތީފް އެ މަގާމުން އިސްތިއުފާދެއްވުމަށް ފަހު، އަނެއްކާ ވެސް އެމްޑީޕީއާ ގުޅިވަޑައިގެންފި އެވެ.

ދަ ޑިމޮކްރޭޓްސް އަކީ އެމްޑީޕީ ދެބައިވެގެން ނިކުތް ޕާޓީއެކެވެ.

އެމްޑީޕީގެ މަޖިލިސް މެންބަރުންތަކެއް ޕާޓީން ވަކިވެ، ދަ ޑިމޮކްރެޓްސް އުފެއްދީ ރިޔާސީ އިންތިހާބަށް ތިން މަހަށް ވެފައިވަނިކޮށް، އެމްޑީޕީގެ އަސާސްތަކާ ޕާޓީގެ ލީޑާޝިޕުން ހަލާފުވެފައިވާ ކަމަށް ބުނަމުންނެވެ.

ހަސަން ލަތީފް ޑިމޮކްރެޓްސްއިން އިސްތިއުފާ ދެއްވީ އިއްޔެގެ ވަގުތެއްގަ އެވެ.

ހަސަންގެ އިތުރުން ރައީސް އޮފީހުގެ ކުރީގެ މިނިސްޓަރު މުޙައްމަދު ޝިފާޒު އާއި އެސްޓީއޯގެ ކުރީގެ އެމްޑީ ހުސައިން އަމްރު ވަނީ އެ ޕާޓީ ދޫކޮށް އެމްޑީޕީއަށް އަލުން ގުޅިފަ އެވެ.

އެމްޑީޕީން ވަނީ، އެ ޕާޓީގެ ކުރީގެ ޗެއާޕާސަން ހަސަން ލަތީފް އާއި ކުރީގެ ނައިބު ރައީސް މުޙައްމަދު ޝިފާޒު އަލުން އެ ޕާޓީއާ ގުޅިވަޑައިގަތުމުން މަރުހަބާ ދަންނަވާފަ އެވެ.

އެމްޑީޕީން އަންނަނީ މި ސަރުކާރު ޖަވާބުދާރީ ކުރުވުމުގެ ނަމުގައި ހަރަކާތްތައް ފުޅާ ކުރަމުންނެވެ. އަދި ޕާޓީ ވަރުގަދަ ކުރުމަށް ކުރާ މަސައްކަތް ތަކުގެ ތެރެއިން މަޖިލީހުގެ މެދު ހެންވޭރު ދާއިރާގެ ކުރީގެ މެންބަރު އަލީ އާޒިމު ވެސް ވަނީ ޑިމޮކްރެޓްސް ދޫކުރައްވާ އެމްޑީޕީ އާ ގުޅިވަޑައިގެންފަ އެވެ.

އެމްޑީޕީ