މީރާއަށް މިދިޔަ އަހަރު 1 ބިލިއަން ޑޮލަރުގެ އާމްދަނީއެއް ލިބިއްޖެ

މީރާ

މިދިޔަ އަހަރު ދައުލަތުގެ ޓެކްސް އިދާރާ، މީރާ މެދުވެރިކޮށް 1 ބިލިއަން ޑޮލަރުގެ އާމްދަނީއެއް ލިބިފައިވާ ކަމަށް އެ އިދާރާއިން އާންމުކުރި ތަފާސްހިސާބުތަކުން ދައްކައިފިއެވެ.

މީރާއިން އެންމެ ފަހުން އާންމުކުރި ދައުލަތުގެ އާމްދަނީގެ ތަފާސްހިސާބުތަކަށް ބަލާއިރު، މިދިޔަ އަހަރު އެ އިދާރާއަށް ޖުމްލަ 27.8 ބިލިއަން ރުފިޔާގެ އާމްދަނީ ލިބިފައިވެއެވެ.

މީރާއަށް މިދިޔަ އަހަރު ލިބުނު އާމްދަނީގެ ތެރޭގައި ހިމެނެނީ ޑޮލަރުން ލިބުނު 1 ބިލިއަން އާއި ދިވެހި ފައިސާއިން ލިބުނު 11.5 ބިލިއަން ރުފިޔާއެވެ. މިއީ ޓެކްސްގެ ގޮތުގައި ދައުލަތަށް 1 ބިލިއަން ޑޮލަރުގެ އާމްދަނީއެއް ލިބުނު ފުރަތަމަ އަހަރެވެ.

މިދިޔަ މަހު އެ އިދާރާއަށް ލިބުނު އާމްދަނީއަކީ އެ މުއްދަތުގައި ލިބޭނެ ކަމަށް ކުރިން އަންދާޒާ ކުރި އަދަދަށް ވުރެ 20.1 އިންސައްތަ އިތުރު އަދަދެކެވެ. ޑިސެމްބަރުގެ އާމްދަނީ އިތުރުވީ ޓޫރިޒަމް ދާއިރާގެ ޓެކްސް، ވޯކް ޕާމިޓް ފީ، ގްރީން ޓެކްސް، އެކްސްޕެޓްރިއޭޓް ކޯޓާ ފީ އަދި އާންމު މުދަލާއި ޚިދުމަތުން ނަގާ ޓެކުހުގެ އާމްދަނީ އިތުރުވުމުގެ ސަބަބުންނެވެ.

މިދިޔަ މަހު އެންމެ ބޮޑު އާމްދަނީއެއް މީރާއަށް ލިބުނީ ޖީއެސްޓީގެ ގޮތުގައެވެ. އެގޮތުން ޖީއެސްޓީގެ ގޮތުގައި ޑިސެމްބަރު މަހު 1.3 ބިލިއަން ރުފިޔާ ލިބިފައިވާއިރު، އެއީ ޖުމްލަ އާމްދަނީގެ 57.3 އިންސައްތަ އެވެ. ޓޫރިޒަމް ލޭންޑް ރެންޓުގެ ގޮތުގައި 378 މިލިއަން ރުފިޔާ އަދި އިންކަމް ޓެކްސްގެ ގޮތުގައި 116 މިލިއަން ރުފިޔާ ލިބިފައިވެއެވެ.

މީރާ