މާފަންނު ސަހަރާގެ ޕަމްޕް ސްޓޭޝަން މަރާމާތުކޮށް އަލުން ހިންގަން ފަށައިފި

މާލޭގެ މާފަންނު ސަހަރާގައި ހުރި ޕަމްޕް ސްޓޭޝަން ހަލާކުވުމާ ގުޅިގެން، އެ ސްޓޭޝަން މަރާމާތުކޮށް އަލުން އޮޕަރޭޝަނަށް ގެނެސްފައިވާ ކަމަށް އިމާރާތްކުރުމާއި، ގެދޮރުވެރިކަމާއި ބިނާވެށި ބެހޭ ވުޒާރާއިން ބުނެފިއެވެ.

މާލޭގައި ވިއްސާރަވެހި ފެންބޮޑުވުމާ ގުޅިގެން، ކޮންސްޓްރަކްޝަން މިނިސްޓްރީން ވަނީ މާފަންނު ސަރަހައްދުގައި ޕަމްޕް ސްޓޭޝަންތައް ޤާއިމްކޮށްފައެވެ. ނަމަވެސް މާލެ ސިޓީ ކައުންސިލުން މާފަންނު ސަހަރާ ކޮނުމުގެ މަސައްކަތް ކުރަމުންދިޔައިރު، އެތަނުގައި ހުރި ޕަމްޕް ސްޓޭޝަން ހަލާކުވެފައިވާ ކަމަށް ބުނެއެވެ.

މި މައްސަލައާ ގުޅިގެން ކޮންސްޓްރަކްޝަން މިނިސްޓަރު މުއްތަލިބު އާއި މާލެ ސިޓީ މޭޔަރު އާދަމް އާޒިމް އާ ދެމެދު ސޯޝަލް މީޑިއާގައި ޚިޔާލު ތަފާތުވުންތަކެއް އުފެދުނެވެ. މޭޔަރު ވިދާޅުވީ ޕަމްޕް ސްޓޭޝަން ހަލާކުވެގެން އެކަމުގެ ޝަކުވާ މިނިސްޓްރީއާ ހިއްސާކޮށްފައިވާނެ ކަމަށެވެ. ނަމަވެސް މިނިސްޓަރު މުއްތަލިބު ވިދާޅުވީ ޕަމްޕް ސްޓޭޝަން ޤާއިމްކުރީ ސަހަރާ ސާފުކުރުމަށްފަހު ކަމަށާއި، އެތަން އަލުން ކޮނުމުގެ މާނައެއް ނެތް ކަމަށެވެ.

ކޮންސްޓްރަކްޝަން މިނިސްޓްރީން ނެރުނު ބަޔާނެއްގައި ބުނެފައިވަނީ މާފަންނު ސަހަރާގައި ހުރި ޕަމްޕް ސްޓޭޝަނާއި އެ ސްޓޭޝަނަށް ގުޅާފައިވާ ހޮޅިތައް ބޭނުންނުކުރެވޭ ވަރަށް ހަލާކުވެފައިވާ ކަމަށެވެ. އަދި މި ގެއްލުން ލިބިފައިވަނީ އެއްވެސް މަޝްވަރާއެއް ނެތި އެ ސަރަހައްދު ކޮނުމުގެ ސަބަބުން ކަމަށް ބުނެފައިވެއެވެ.

މިނިސްޓްރީން އިތުރަށް ބުނެފައިވަނީ ރޯޑް ކޯޕަރޭޝަނާއި ސްޓެލްކޯގެ އެހީތެރިކަމާއެކު މާފަންނު ސަހަރާގައި ހުރި ޕަމްޕް ސްޓޭޝަން ވަގުތީގޮތުން މިހާރު އޮޕަރޭޝަނަށް ގެނެސްފައިވާ ކަމަށެވެ. މާފަންނަކީ މާލޭގައި އެންމެ ބޮޑަށް ފެންބޮޑުވާ ސަރަހައްދު ކަމަށްވެފައި، މި މައްސަލައަށް ދާއިމީ ހައްލެއް ހޯދުމަށް އެތައް މަސައްކަތްތަކެއް ކުރެވިފައިވީ ނަމަވެސް، އަދިވެސް އެކަށީގެންވާ ހައްލެއް ލިބިފައެއް ނުވެއެވެ.