މާލޭގެ ގެއެއް ގަނބައިގަނެގެން މީހުން ހުސްކޮށްފި

އިމާރާތައްވެފައިވާ ގެއްލުން / ފޮޓޯ: މާލޭސިޓީ ކައުންސިލް

މާލޭގައި ގެއެއް އިމާރާތްކުރަމުން ދަނިކޮށް، އެ ގެއާ ޖެހިގެން ހުރި ގެއެއްގެ ބައެއް މިއަދު ގަނބައިގެންގޮސް، އެ ގޭގައި ދިރިއުޅޭ މީހުން އެހެން ތަނަކަށް ބަދަލުކޮށްފިއެވެ.

މާލޭ ސިޓީ ކައުންސިލުން މިއަދު ހާމަކުރި ގޮތުގައި، މާފަންނު އިއްޒުއްދީން މަގުގައި ހުންނަ މ. ނެވިގޭޓާ އިމާރާތްކުރަމުން ދަނިކޮށް، އެ ގެއާ ޖެހިގެން ހުރި މ. ލަކީ ހެވަންގެ ބައެއް ގަނބައިގަނެ އަޑިއަށް ގޮސްފައިވެއެވެ. މި ހާދިސާ ހިނގީ މިއަދު މެންދުރުފަހުގެ ވަގުތެއްގައެވެ.

ސިޓީ ކައުންސިލުން ބުނީ މިކަން ހިނގަން މެދުވެރިވީ ނެވިގޭޓާގެ އިމާރާތްކުރަމުން ދިޔައިރު، ޝީޓް ޕައިލް ނުކޮށް ހުރުމުގެ ސަބަބުން ކަމަށް ބެލެވޭ ކަމަށެވެ. އެހެންވުމުގެ ސަބަބުން ލަކީ ހެވަންގޭގެ ފާރުތަކުގައި ރެނދުލައި އަޑިއަށް ދާކަން ފާހަގަކުރެވިފައިވާ ކަމަށް ސިޓީ ކައުންސިލުން ހާމަކުރިއެވެ.

ލަކީ ހެވަންގޭގައި ދިރިއުޅެމުން ދިޔަ ހަތަރު އާއިލާގެ 18 އަހަރުން ދަށުގެ ތިން ކުދިންނާއި ހަ މީހުން އަދި ދެ ކޮޓަރީގައި ކުއްޔަށް އުޅެމުންދިޔަ ބިދޭސީން އެހެން ތަނަކަށް ބަދަލުކުރުމުގެ މަސައްކަތް ސިޓީ ކައުންސިލުން ކުރަމުންދާ ކަމަށް އެ ކައުންސިލުން މަޢުލޫމާތު ދީފައިވެއެވެ.

މާލެ ސިޓީ ކައުންސިލް