ހުޅުމާލޭ ދެވަނަ ފޭހުގެ ޓްރާންސްފޯމަރު ތަކަކަށް ބަޔަކު ގެއްލުން ދީފި

ހުޅުމާލޭގައި ހުރި ޓްރާންސްފޯމަރު ތަކަށް ގެއްލުން ދިނުން --

ހުޅުމާލޭ ދެވަނަ ފޭހުގައި ހުންނަ ޓްރާންސްފޯމަރު ތަކަކަށް ގެއްލުން ދީފި އެވެ.

ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ އެކްސްގައި މިއަދު ކުރެއްވި ޕޯސްޓެއްގައި ވިދާޅުވެފައިވަނީ ހުޅުމާލޭ ދެ ވަނަ ފޭހުގައި ހުރި އެ ކުންފުނީގެ ހައި ވޯލްޓޭޖް (އެޗްވީ)ގެ ދެ ޓްރާންސްފޯމަރަށް ބަޔަކު ގެއްލުން ދީފައިވާ ކަމަށެވެ.

ފަހުމީ ވިދާޅުވީ ހައި ވޯލްޓޭޖު ޓްރާންސްފޯމަރު ބަހައްޓާފައިވާ ތަނުގެ ގޭޓާއި އެތަނުގެ ތަޅުތައް ހަލާކުކޮށް އެޗްވީ ސިސްޓަމަށް ގެއްލުން ދީފައިކަމަށެވެ. އަދި އެހެންވެ، ކަރަންޓު ކަނޑިގެން ވެސް ދިޔަ ކަމަށެވެ.

އެމްޑީ ފަހުމީ ވިދާޅުވީ ޓްރާންސްފޯމަރު ތަކަށް ގެއްލުން ދީފައިހުރި ގޮތަށް ބަލާއިރު އެކަން ކޮށްފައި ވަނީ ޓްރާންސްފޯމަރު ސިސްޓަމް ތަކާއި އޭގެ އޮޕަރޭޝަންގެ މައުލޫމާތު އެނގޭ ބަޔަކު ކަމަށެވެ.

މީގެ އިތުރުން ޓްރާންސްފޯމަރު ފަދަ ކަރަންޓާ ގުޅުން ހުންނަ އެފަދަ ތަންތަނަށް ގެއްލުން ދިނުމަކީ އެކަން ކުރާ މީހެއްގެ ފުރާނައަށް ނުރައްކާ ވެދާނެ ކަމެއްކަން ފަހުމީ ވަނީ ފާހަގަ ކުރައްވާފަ އެވެ.

މި މައްސަލަ ކަމާބެހޭ ފަރާތް ތަކަށް ހުށަހަޅާފައިވާކަން ފާހަގަ ކުރައްވަމުން ފަހުމީ ވިދާޅުވީ ކުރިއަށް އޮތް ތަނުގައި މިފަދަ ކަންކަން ތަކުރާރުވިޔަ ނުދިނުމަށް ޓަކައި އަޅާންޖެހޭ ފިޔަވަޅުތައް އެޅުމުގެ މަސައްކަތް މިހާރު ކުރަމުން އަންނަ ކަމަށެވެ.

ސްޓެލްކޯ ހުޅުމާލެ