ގައިދީއަކަށް ލިބެންޖެހޭ އެއްވެސް އިނާޔަތެއް އުންޏެއް ނުކުރަން: ކަރެކްޝަން

ކަރެކްޝަން އޮފިސަރުންގެ ބެލުމުގެ ދަށުން ގައިދީއަކު ޖަލުން ނެރެނީ --

ޖަލުތަކުގައި ތިބޭ ގައިދީންނާއި ބަންދު މީހުންނަށް ލިބެންޖެހޭ އެއްވެސް އިނާޔަތެއް އުނިކޮށްފައި ނުވާނެ ކަމަށް މޯލްޑިވްސް ކަރެކްޝަނަލް ސާވިސް އިން މިއަދު ބުނެފި އެވެ.

ކަރެކްޝަނުން މިހެން ބުނެވައި މިވަނީ ޝަރީއަތް ނިމެންދެން ޖަލުގައި ބަންދު ކުރެވިފައިވާ ފަރާތް ތަކަށް ލިބެން ޖެހޭ އަސާސީ ހައްގުތައް ނުލިބޭ ކަމަށް ބުނެ، މާފުށީ ޖަލުގައި ހައިހޫނު ކަމުގެ ހަޅުތާލެއް ފަށައިގެން އުޅޭ ކަމުގެ އަޑުތަކެއް ފެތުރެމުން އަންނަނިކޮށެވެ.

އެކަމާ ގުޅުވައި ކަރެކްޝަނުން ކުރި ޓްވީޓުގައި ބުނެފައިވަނީ ޖަލުތަކުގެ ސަލާމަތާއި ރައްކާތެރިކަން ކަށަވަރު ކުރުމަށާއި މަސައްކަތްތައް ހަރުދަނާ ކުރުމުގެ ގޮތުން ބައެއް އުސޫލުތަކަށް ބަދަލުގެނެވުނު ނަމަވެސް، އެ ސާވިސްގެ ބެލުމުގެ ދަށުގައިވާ ގައިދީންނާއި ބަންދު މީހުންނަށް ލިބެންޖެހޭ އެއްވެސް އަސާސީ އިނާޔަތެއް، ނުވަތަ ހިދުމަތެއް ވެސް އުނިކުރެވިފައި ނުވާ ކަމަށެވެ.

މާފުށީ ޖަލުގައި ތިބި ބައެއް ބަންދު މީހުން އެ ހިދުމަތުން ފޯރުކޮށްދޭ ކާބޯތަކެތި ބައެއް ފަހަރު ނުނެގި ނަމަވެސް، ވިޔަފާރި އުސޫލުން ގަނެފައިވާ ތަކެތި ބޭނުން ކުރަމުންދާ ކަމަށާއި އެއްވެސް ކަމަކާ ގުޅިގެން އެއްވެސް ބަންދު މީހެއްގެ ސިއްހީ ހާލަތު ގޯސްވެ، ހޮސްޕިޓަލްގައި އެޑްމިޓްކޮށް ވަކި ހާއްސަ ފަރުވާ ދެވިފައިވާ ނުވާކަން ވެސް ކަރެކްޝަނުން ފާހަގަކޮށްފައިވެ އެވެ.

ކަރެކްޝަން ސާރވިސް މާފުށި ޖަލު