ޔޫރަޕްގެ ސަރަހައްދަށް އަރައިގަތުމުގެ ފުރުސަތު ނުދޭނެކަމަށް ފުރާންސުން ބުނެފި

ކިތަންމެ ބާރުގަދަ ގައުމެއްނަމަވެސް އެގައުމުން ޔޫރަޕްގެ އިއްތިހާދުގެ ގައުމަކަށް އަރައިގަތުމުގެ ފުރުސަތު ނުދޭނެކަމަށާއި ޔޫރަޕް ބަލިކަށި ކަމަށް ލަފާކުރާ ގައުމުތަކަށްވަނީ ހަގީގަތް އޮޅިފައިކަމަށް ފުރާންސުން ބުނެފިއެވެ.

ފުރާންސުގެ ފޮރިން މިނިސްޓަރު ޖީން ނޮވެލް ބެރޮޓް ވިދާޅުވީ އެހެން ގައުމަކުން ޔޫރަޕްގެ އިއްތިޙާދުގެ ސަރަހައްދީ ރޮނގަށް އަރައިގަތުމަށް ފުރުސަތު ނުދޭނެކަމުގައެވެ. މިގޮތަށް ވިދާޅުވެފައިވަނީ ޑެންމާކުގެ ސަރަހައްދެއް ކަމަށްވާ ގްރީންލެންޑް އެމެރިކާގެ ބާރުގެ ދަށަށް ގެންނާނެކަމަށް އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ދައްކަވާ ވާހަކަތަކަށް އިޝާރާތް ކުރައްވައެވެ.

ބެރޮޓް ވިދާޅުވީ ޔޫރަޕަކީ ބަލިކަށިވެފައިވާ ބައްރެއްކަމަށް ހީވާނަމަ އެއީ ކުށްހީއެއްކަމަށާއި ޔޫރަޕަކީ އަދިވެސް ބާރުގަދަ ބައްރެއްކަމުގައެވެ. ގްރީންލެންޑް އެމެރިކާގެ ބާރުގެ ދަށަށް ގެންނާނެކަމަށް ޓްރަމްޕް ދައްކަވާ ވާހަކަ އޭނާ ގެންދަވަނީ ތަކުރާރު ކުރައްވަމުންނެވެ.

ދާދިފަހުން ޓްރަމްޕްވަނީ ގްރީންލެންޑް އަގުދީފައި ގަނެގެން ސުލްހަވެރިކަމާއެކު އެތަން އެމެރިކާގެ ބާރުގެ ދަށަށް ނުގެނެވިއްޖެނަމަ އެކަންކުރާނެ އެނޫންވެސް ގޮތްތައް އެބަ ހުރިކަމަށް ވިދާޅުވެ ވާހަކަ ދައްކަވާފައެވެ. ނަމަވެސް ގްރީންލެންޑަށް އެމެރިކާ އަސްކަރީ ގޮތުން އަރައިގަންނާނެކަމަށް ޓްރަމްޕް ވިދާޅުވެފައެއް ނުވެއެވެ.

މިމައްސަލާގައި ޑެންމާކުގެ ބޮޑުވަޒީރާ މެއްޓޭ ފްރެޑްރިސްސެން ވަނީ ވަރަށްކަންބޮޑުވެ ވަޑައިގެން ވާހަކަ ދައްކަވާފައެވެ. މެއްޓޭ ވިދާޅުވީ ގްރީންލެންޑަކީ ވިއްކާގޮތަށް އޮންނަ ބިމެއްނޫންކަމަށާ އަދި އެއީ ގަދަކަމުން އަތުލައި ގަނެވޭނެ ބިމެއްވެސް ނޫންކަމުގައެވެ. ޑެންމާކުގެ ބައެއްގެ ގޮތުގައި ގްރީންލެންޑް އޮންނަތާ ވަނީ ހަ ގަރުނުވެފައެވެ.