ރާއްޖޭގެ ހުރިހާ ރަށެއްގައި މި އަހަރު ކުނި މެނޭޖްކުރުމުގެ ނިޒާމު ޤާއިމުކުރާނަން: ރައީސް

މި އަހަރު ތެރޭގައި ރާއްޖޭގެ ހުރިހާ ރަށެއްގައި ކުނި މެނޭޖްކުރުމުގެ ނިޒާމު ޤާއިމުކޮށް، ކުނީގެ މައްސަލައަށް ޙައްލު ގެންނަވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ގދ. ފިޔޯރީ ރައްޔިތުންނާ ބައްދަލު ކުރެއްވުމުގައެވެ.

ރައީސް މުޢިއްޒު ވިދާޅުވީ މިއީ ބޮޑު ގޮންޖެހުމެއް ނަމަވެސް، ކޮންމެ ރަށެއްގެ ނިސްބަތުން އެ ރަށުގައި ކުނި މެނޭޖްކުރުމުގެ ނިޒާމު ޤާއިމުކޮށް، މުޅި މައްސަލައަށް ޙައްލު ގެނައުމަށް އަމާޒު ހިފާފައިވާ ކަމަށެވެ. މިއީ ވަރަށް އެމްބިޝަސް އަދި އެޗީވަަބަލް ޓާގެޓެއް ކަމަށްވެސް އެމަނިކުފާނު ވިދާޅުވިއެވެ.

ރަށްރަށުގައި ކުނި މެނޭޖްކުރުމުގެ ނިޒާމު ޤާއިމުކުރުމުގައި އެ ރަށަކަށް އަރައި ފައިބާ ނިސްބަތާއި، ރަށުގައި ހުރި ސިނާޢަތްތަކުގެ އިތުރުން ހިނގާ މަސައްކަތްތަކަށް ބަލައި، އެ ރަށަކަށް ބޭނުންވާ ފެންވަރުގެ ނިޒާމެއް ޤާއިމުކޮށްދޭނެ ކަމަށް ރައީސް ވިދާޅުވިއެވެ.

"މަގޭ ސާފު ރާއްޖެ" ނަމުގައި ރަށްރަށުގެ ކުނި މެނޭޖުކުރުމުގެ ޤައުމީ ޕްރޮގްރާމެއް މިދިޔަ ފެބްރުއަރީގައި ވަނީ ފަށާފައެވެ. މި ޕްރޮގްރާމްގެ މައިގަނޑު މަޤްޞަދަކީ ތިމާވެއްޓާ ރައްޓެހި، ދެމެހެއްޓެނިވި ގޮތެއްގައި ކުރިއަށް ގެންދެވޭނެ ކުނި މެނޭޖްކުރުމުގެ ފުރިހަމަ ނިޒާމުތަކެއް ޤާއިމުކުރުމެވެ.

މި ޕްރޮގްރާމްގެ ދަށުން ރަށުން ބޭރުކުރަން ޖެހޭ ކުނި ގެންގޮސް ތިމާވެއްޓާ ރައްޓެހި ގޮތެއްގައި ނައްތާލެވޭނެ ސަރަޙައްދީ މަރުކަޒުތަކެއް ތަރައްޤީކުރުމާއި، ސަރަޙައްދީ މަރުކަޒުތަކާއި ރަށްތަކާ ދެމެދު ކުނި ގެންދެވޭނެ އިންތިޒާމު ހަމަޖެއްސުން ހިމެނެއެވެ.