މި އަހަރުން ފަށައިގެން ޑަބްލިޔުޑީސީ މެންބަރުންނަށް ރޯދަ އިނާޔަތް ދެނީ

ރައްޔިތުންގެ މަޖިލީސް ދެން އަންނަ ދައުރަށް ހުޅުވޭ ފުރަތަމަ ހަފުތާ ތެރޭ، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ވެވަޑައިގެންނެވި ވައުދު ފުއްދެވުމަށް ހުށަހަޅަންޖެހޭ އިސްލާހު، ހުށަހަޅުއްވާނެ ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ، ހުވަދުއަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، ގދ. ވާދޫ ރައްޔިތުންނާ ބައްދަލުކުރައްވަ އެވެ.

ރައީސް ވިދާޅުވީ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް އެލަވަންސް ދިނުމަށް ޓަކައި ވަޒީފާއާބެހޭ ގާނޫނާއި ލާމަރުކަޒީ ގާނޫނަށް އިސްލާހު ގެންނަން ރައްޔިތުންގެ މަޖިލީހަށް ހުށަހަޅުއްވާނެ ކަމަށެވެ.

އެގޮތުން މި ދެ އިސްލާހުގެ ތެރޭގައި މިހާރު ލިބޭ އެލަވަންސަށް މުސާރައިގެ ދަރަޖަ ދިނުމަށް މަސައްކަތް ކުރައްވަމުންގެންދަވާކަން އެ އެގޮތުން މިހާރު އެލަވަންސެއްގެ ގޮތުގައި ފައިސާ ދެމުންދާތީ، އެ ކަނބަލުންނަށް ރޯދަ އެލަވަންސް ދިނުމަށް ހުރި ހުރަސްތަކާއި ބޭންކުތަކުން ލޯނު ހޯދުމަށް ދިމާވާ ދަތިތަކުގެ އިތުރުން، ވިހެއުމުގެ ޗުއްޓީ ފަދަ ކަންކަން ހަމަޖައްސައިދިނުމުގައި ކުރިމަތިވެފައިވާ ގޮންޖެހުންތައް އެ މަނިކުފާނުގެ ވާހަކަފުޅުގައި ތަފްސީލު ކޮށްދެއްވި އެވެ.

ރައީސްގެ ވާހަކަފުޅުގައި، މި ބަދަލަކީ މިދިޔަ އެއް އަހަރުތެރޭ އެ މަނިކުފާނަށް ބައްދަލުކުރެއްވުނު އަންހެނުންގެ ކޮމެޓީ ތަކަކުންވެސް އެދިލެއްވި އެއް ކަމެއް ކަމުގައި ވިދާޅުވި އެވެ.

އެގޮތުން މި އިސްލާހުތައް ގެނެސް އަންނަ ރޯދަ މަހުން ފެށިގެން ކޮންމެ ރަމަޟާން މަހެއްގައި ވެސް އަންހެނުންގެ ކޮމެޓީ ތަކުގެ މެންބަރުންނަށް ރޯދަ މަހުގެ އިނާޔަތް ލިބޭނެ ކަމަށާއި އަދި އެ އެލަވަންސަކީ މުސާރަ ލިބޭ އެހެން މުވައްޒަފުންނަށް ލިބޭ ކަހަލަ މުސާރައިގެ ހައިސިއްޔަތު ލިބިފައިވާ އެއްޗަކަށް ބަދަލުކުރެވޭނެކަން އެ މަނިކުފާނުގެ ވާހަކަފުޅުގައި ފާހަގަކުރެއްވި އެވެ.

އަދި އެކަމުގެ ސަބަބުން ފުލްޓައިމްކޮށް ވަޒީފާއަށް ނުކުންނަން ނުޖެހޭނެ ކަމަށާއި، މިހާރުވެސް މަސައްކަތް ކުރާ އުސޫލުން މަސައްކަތް ކުރުމުން އެ އިނާޔަތްތައް ލިބޭނެ ޔަގީންކަން އެ މަނިކުފާނު ދެއްވި އެވެ.

އަންހެނުންނަކީ ކޮންމެ ރަށެއްގެވެސް ރަށު ތަރައްގީއަށް އެންމެ ހަރަކާތްތެރިކޮށް މަސައްކަތްކުރާ ފަރާތްތައް ކަމަށްވާއިރު، އެކަމުގެ އަގުވަޒަންކުރައްވަން ބޭނުންފުޅުވާކަމުގައި ރައީސްގެ ވާހަކަފުޅުގައި ވިދާޅުވި އެވެ.

އެކަމުގައި ސަރުކާރުން ދެއްވެން އޮތް ހުރިހާ އެއްބާރުލުމެއް ދޭނެ ކަމަށާއި އަންހެނުންނާއި ފިރިހެނުން ހަމަހަމަކަމާ އެކީގައި، އެއް ހައިސިއްޔަތެއް ލިބިގެން، ރަށުގެ އަދި ގައުމުގެ ތަރައްގީއަށް މަސައްކަތްކުރާ ބައެއްގެ ގޮތުގައި ހެދުމަކީ އެ މަނިކުފާނުގެ ވިސްނުންފުޅެއް ކަމަށާއި އެކަމަކީ ސަރުކާރުން ގެންގުޅޭނެ ސިޔާސަތެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ.

އެގޮތުން މަތިފަޑީގައި، ޓޮޕް މެނޭޖްމަންޓުގައި އަންހެންނަށް ޖާގަ ދިނުމަކީ ސަރުކާރުގެ ސިޔާސަތު ކަމުގައި އެ މަނިކުފާނު ވިދާޅުވި އެވެ.

މިދިޔަ ހުރިހާ ސަރުކާރުތަކާ އަޅާކިޔާއިރުގައި، މި ސަރުކާރުގައި ކުންފުނިތަކުގެ ވެރިން އަދި އެހެނިހެން އިސް ލެވެލްތަކުގައިވެސް އެންމެ ގިނަވާނީ އަންހެނުން ކަމަށާއި މީގެ ކުރިން އަންހެނަކު ލީޑް ނުކުރާ މުއައްސަސާތަކުގައި ގައުމީ ލެވެލްގައި ވެސް މިހާރު އަންހެނުން ތިބޭނެ ކަމަށް އެ މަނިކުފާނު ފާހަގަކުރެއްވި އެވެ.

އަންހެނުން ކުރާ މަސައްކަތުގައި، އެ ދޭންވާ "ރެކޮގްނިޝަން" ދީ، ފުރުސަތުތައް ފަހިކޮށްދިނުމަކީ ސަރުކާރުގެ ސިޔާސަތު ކަމުގައި ރައީސުލްޖުމްހޫރިއްޔާ ވިދާޅުވި އެވެ.