އެއާޕޯޓުގަ އެކްސިޑެންޓު ހިނގީ ޑުރައިވަރަށް ސިއްހީ ކަމެއް ދިމާވެގެން

ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި މިއަދު ހެނދުނު 9:45 އެހާކަންހާއިރު ވަރަށް ނުރައްކާތެރި އެކްސިޑެންޓެއް ހިނގައިފިއެވެ.

 މި އެކްސިޑެންޓުގައި ކާރަކާއި ޕިކަޕެއް ޖެހި، ކާރު ވަރަށް ބޮޑަށް ހަލާކުވެފައިވާ މަންޒަރު މީސްމީޑިއާގައި ދައުރުވަމުންދެއެވެ.

ފުލުހުން ބުނާ ގޮތުގައި މި އެކްސިޑެންޓުގައި ކާރު ދުއްވަން އިން މީހާއަށާއި ފަހަތު ސީޓުގައި އިން މީހާއަށް އަނިޔާވެފައިވެއެވެ. ކާރު ދުއްވަން އިން މީހާއަށް ފަރުވާދެމުން އަންނަނީ ހުޅުމާލޭ ހޮސްޕިޓަލުގައެވެ. އެހެންނަމަވެސް ފަހަތު ސީޓުގައި އިން މީހާއަށް ސީރިއަސް އަނިޔާތަކެއް ނުވާ ކަމަށާއި އޭނާއަށް ފަރުވާދީފައިވަނީ އެއާޕޯޓު ކްލިނިކުން ކަމަށް ފުލުހުން ބުނެފައިވެއެވެ.

ވީއައިއޭ ހިންގާ އެމްއޭސީއެލްއިން ބުނެފައިވާ ގޮތުގައި، މި އެކްސިޑެންޓު ހިނގަން މެދުވެރިވީ ކާރު ދުއްވަން އިން މީހާއަށް ކުއްލި ސިއްޙީ ހާލަތެއް މެދުވެރިވުމުގެ ސަބަބުން ކަމަށް ޕްރެލިމިނަރީ އެސެސްމެންޓްތަކުން ލަފާކުރެވެއެވެ.

"މިއަދު ހެނދުނު  10 ޖަހާކަންހާއިރު ވެލާނާ އިންޓަރނޭޝަނަލް އެއަރޕޯޓްގައި ޓެކްސީއެއް ކޮންޓުރޯލް ނުކުރެވި ގޮސްވަނީ އެކްސިޑެންޓެއް ހިނގައިފައެވެ. މި އެކްސިޑެންޓް ހިނގަން މެދުވެރިވީ ދުއްވަމުން ދިޔަ ޑްރައިވަރަށް ދިމާވި ސިއްޙީ ކުއްލި ހާލަތެއްގެ ސަބަބުންކަމަށް ޕްރެލިމިނަރީ އެސެސްމެންޓްތަކުން ލަފާ ކުރެވެއެވެ. ޙާދިސާ ހިނގިގޮތް އިތުރަށް ބަލަމުންދާވާހަކަ މި ފުރުޞަތުގައި ދަންނަވަމެވެ" އެމްއޭސީއެލު އިން "އެކްސް" ގައި ކުރި ޕޯސްޓެއްގައި ބުނެފައިވެއެވެ.

ފުލުހުން ބުނާ ގޮތުގައި ޕިކަޕުގައި ޖެހުމުގެ ކުރިން ކާރު ރޯޑް ޑިވައިޑާތަކާއި ވޭނެއްގައި ވެސް ޖެހުނެވެ. މި އެކްސިޑެންޓުގެ ކަންތައްތައް ފުލުހުން ދަނީ ތަޙުޤީޤު ކުރަމުންނެވެ.