ޙައްޖަށް މީހުން ފޮނުވުމުގެ އުސޫލަށް ބޮޑެތި ބަދަލުތަކެއް ގެނައުމަށް ރައީސް ނިންމަވައިފި

ހައްޖަށް މީހުން ގެންދިއުމުގައި ހައްޖު ކޯޕަރޭޝަނުން މުހިއްމު ދައުރެއް އަދާކުރޭ

ރާއްޖެއިން ޙައްޖަށް މީހުން ފޮނުވުމުގެ އުސޫލަށް މުހިންމު ބަދަލުތަކެއް ގެނައުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމަވައިފިއެވެ.

މި ބަދަލުތަކާއެކު، ޙައްޖުގެ އަޅުކަން އަދާނުކޮށް ތިބި މީހުންނަށް އިސްކަންދޭ ގޮތަށް އަންނަ އަހަރުން ފެށިގެން ޢަމަލުކުރެވޭނެއެވެ.

އައު އުސޫލުގެ ދަށުން، އަލަށް ޙައްޖުގެ އަޅުކަން އަދާކުރަން އެދޭ ފަރާތްތަކަށް އިސްކަން ދެވޭނެއެވެ. އަދި 65 އަހަރުން މަތީގެ މީހުންނަށް ޙައްޖު ކޯޕަރޭޝަނުގެ ކޯޓާގެ ވަކި އިންސައްތައެއް ކޮންމެ އަހަރަކު ޚާއްޞަކުރެވޭނެއެވެ.

75 އަހަރުން މަތީގެ މީހުންގެ ތެރެއިން ސިއްޙީ ހާލަތަށް ބަލައި އެހީތެރިއަކު ގެންދަންޖެހޭ ފަރާތްތަކަށް ޚާއްޞަ އިނާޔަތްތަކެއް ލިބޭނެއެވެ. ނަމަވެސް، އެހީތެރިއެއްގެ ގޮތުގައި ގެންދެވޭނީ ކުރިން ޙައްޖުގެ އަޅުކަން އަދާކޮށްފައި ނެތް ފަރާތެކެވެ.

ކުރިން ޙައްޖުގެ އަޅުކަން އަދާކޮށްފައިވާ ފަރާތްތަކަށް އިތުރު ފުރުސަތެއް ދެވޭނީ، އެންމެ ފަހުން ޙައްޖުގެ އަޅުކަން އަދާކުރިތާ ހިޖުރީ ސަނަތުން ފަސް އަހަރު ވުމުންނެވެ. މި ބަދަލުތަކުގެ މައިގަނޑު މަޤްޞަދަކީ ފަރުޟު ޙައްޖު އަދާކުރުމަށް ދިގު އިންތިޒާރެއްގައި ތިބި ރައްޔިތުންނަށް ޙައްލެއް ހޯދައިދިނުމެވެ.

މިހާރު ޙައްޖު ކޯޕަރޭޝަން މެދުވެރިކޮށް ޙައްޖުގެ އަޅުކަން އަދާކުރުމަށް ކިޔޫގައި 9,115 މީހުން ތިބިއިރު، އޭގެ ތެރެއިން 8,623 މީހުންނަކީ އަލަށް ޙައްޖަށް ދިއުމަށް އެދިފައިވާ ފަރާތްތަކެވެ. މި ބަދަލުތަކާއެކު، މި ފަރާތްތަކަށް ޙައްޖުގެ އަޅުކަން އަދާކުރުމުގެ ފުރުސަތު އަވަސްވެގެންދާނެ ކަމަށް ބެލެވެއެވެ.

ހައްޖުގެ އަޅުކަން ހައްޖު ކޯޕަރޭޝަން