ކުރިއަށް އޮތް 2 ދުވަސް ތެރޭގައި މަޑުމަޑުން މޫސުން ރަނގަޅުވާން ފަށާނެ: މެޓު އޮފީސް

އިއްޔެއަކީ މި ފަހަކަށް އައިސް މޫސުން އެންމެ ގޯސްވި އެއްދުވަސް

ރާއްޖެއަށް މިހާރު ކުރަމުންދާ ވިއްސާރައިގައި މިއަދުވެސް މެދުރާއްޖެ ތެރެއަށާއި އުތުރުގެ ރަށްތަކަށް ބޯކޮށް ވާރޭވެހޭނެ ކަމަށް ލަފާކުރި ނަމަވެސް، ކުރިއަށް އޮތް ދެ ދުވަސް ތެރޭ މޫސުން މަޑުމަޑުން ރަނގަޅުވާން ފަށާނެ ކަމަށް މޫސުމާ ބެހޭ ގައުމީ އިދާރާ (މެޓު އޮފީސް) އިން ލަފާކޮށްފިއެވެ.

މެޓު އޮފީހުން ބުނެފައިވަނީ ކުރިއަށް އޮތް 48 ގަޑިއިރު ތެރޭ މޫސުން މަޑުމަޑުން ރަނގަޅުވާން ފަށާނެ ކަމަށެވެ. އަދި އެހާތަނަށް ކަނޑުތައްވެސް މަޑުވާން ފަށާނެ ކަމަށް އެއިދާރާއިން ލަފާކޮށްފައިވެއެވެ.

މިއަދުގެ ހަވީރު 6 އާ ހަމައަށް އުތުރާއި މެދުރާއްޖެ ތެރޭގެ އެކި ހިސާބަށް ވިއްސާރަ ކުރާނެ ކަމަށާއި، ބައެއް ރަށްތަކަށް ގުގުރުމާ އެކު ބޯކޮށް ވާރޭ ވެހޭނެ ކަމަށް މެޓުން ލަފާކޮށްފައިވެއެވެ. އަދި ދެކުނުގެ ބައެއް ރަށްތަކަށް ކެރީގެ އަސަރު ފޯރި ނަމަވެސް މޫސުން ރަނގަޅުވާނެ ކަމަށްވެސް ބުނެފައިވެއެވެ.

ވިލާގަނޑުގައި 35 މޭލަށް ވައިގަދަވާނެ ކަމަށް ލަފާކޮށްފައިވާއިރު، ވިލާގަނޑުގައި ކަނޑުތައް އިތުރަށް ގަދަވާނެ ކަމަށް މެޓުން ލަފާކުރިއެވެ. އަދި ރާޅުގެ އުސްމިން 4-6 ފޫޓަށް ހުންނާނެ ކަމަށްވެސް ލަފާކޮށްފައިވެއެވެ.

އިއްޔެ ކުރި ވިއްސާރައިގައި އެންމެ ބޯކޮށް ވާރޭ ވެހިފައިވަނީ ހުޅުލެއަށް ކަމަށް ރެކޯޑު ކުރެވިފައިވެއެވެ. ހުޅުލެއަށް 144 މިލިލީޓަރުގެ ވާރޭ ވެހުނު ކަމަށް ރެކޯޑުކޮށްފައިވާއިރު، މާލެއަށް 142.2 މިލިލީޓަރުގެ ވާރޭ ވެހުނު ކަމަށް ރެކޯޑުކުރެވިފައިވެއެވެ. މީގެ އިތުރުން ހުޅުމާލެ، އދ. މާމިގިލި އަދި އއ. ތޮއްޑޫއަށްވެސް ބޯކޮށް ވާރޭވެހިފައިވާ ކަމަށް މެޓުން ހާމަކޮށްފައިވެއެވެ.

މޫސުން މެޓް އޮފީސް