އިންޑިޔާގައި 6 އަހަރުގެ ކުއްޖަކު ރޭޕްކުރި މައްސަލާގައި 30 އަހަރުގެ މީހަކު ހައްޔަރުކޮށްފި

އިންޑިއާގައި އަހަރެއްގެ މައްޗަށް ރޭޕުގެ އެތައް ހާދިސާއެއް ހިންގާފައިވޭ

އިންޑިޔާގައި 6 އަހަރުގެ އަންހެން ކުއްޖަކު ރޭޕްކުރިކަމުގެ ތުހުމަތުގައި 30 އަހަރުގެ ފިރިހެނަކު ހައްޔަރުކޮށްފިއެވެ.

އިންޑިޔާގެ ފުލުހުންނާ ހަވާލާދީ ބޭރުގެ މީޑިއާތަކުން ރިޕޯޓުކޮށްފައިވާ ގޮތުގައި މި މައްސަލައިގެ ތުހުމަތުގައި ހައްޔަރުކޮށްފައިވަނީ އަމަރް ޕްރަތާޕް (30) އެވެ.

މި ހާދިސާ ހިނގާފައިވަނީ ހޯމަ ދުވަހު އެ ކުއްޖާ ދިރިއުޅޭ ގޭގެ ބޭރުގައި ކުޅެން ހުއްޓައެވެ. ޕްރަތާޕްގެ މައްޗަށް ތުހުމަތުކުރެވެނީ އެ ކުއްޖާ ގޮވައިގެން އޭނާގެ ގެއަށް ގެންގޮސް ރޭޕްކުރި ކަމަށެވެ.

އެޑިޝަނަލް ސުޕްރިންޓެންޑެންޓް އޮފް ޕޮލިސް (އޭއެސްޕީ) ނަމްރަތާ ސްރީވާސްތަވާ ވިދާޅުވި ގޮތުގައި، ހާދިސާއަށްފަހު އެ ކުއްޖާ ގެއަށް އައިސް ކުއްޖާގެ އާއިލާއަށް މިކަން އަންގައި، އާއިލާއިން ފުލުހުންނަށް މި މައްސަލަ ރިޕޯޓުކުރިއެވެ.

"އާއިލާގެ ޝަކުވާގެ މައްޗަށް ބިނާކޮށް މައްސަލައެއް ރަޖިސްޓްރީކޮށް ޕްރަތާޕް ވަނީ ހައްޔަރުކޮށްފައި. މި ވަގުތު އިތުރަށް ތަޙްޤީޤު ކުރިއަށްދަނީ،" އޭއެސްޕީ ސްރީވާސްތަވާ ވިދާޅުވިއެވެ.

މި މައްސަލައާ ގުޅިގެން އިންޑިޔާގެ އާންމުން ވަނީ ބޮޑަށް ކަންބޮޑުވެފައެވެ. އިންޑިޔާއަކީ ދުނިޔޭގެ ނިސްބަތުން އެންމެ ގިނައިން ރޭޕްކުރުމާއި މީހުން މެރުން ރެކޯޑް ކުރެވިފައިވާ އެއް ގައުމުކަން ފާހަގަކުރެވެއެވެ. މިފަދަ މައްސަލަތައް ހުއްޓުވުމަށް އިތުރު ފިޔަވަޅުތަކެއް އަޅަންޖެހޭ ކަމަށް ގިނަ ބަޔަކު ގޮވާލަމުންދެއެވެ.

އިންޑިޔާ