އާސެނަލުން ބްރެންޓްފޯޑް ބަލިކޮށް ލިވަޕޫލާ ދެމެދު އޮތް ފަރަގު ކުޑަކޮށްފި

އާސެނަލް މިވަގުތު ވަނީ ރަނގަޅު ފޯމެއްގައި

އިނގިރޭސި ޕްރިމިއާ ލީގުގައި ރޭ ކުޅުނު މެޗުގައި އާސެނަލުން ވަނީ ބްރެންޓްފޯޑް 3-1 އިން ބަލިކޮށް އާ އަހަރު ފެށުން ރަނގަޅުކޮށްފައެވެ.

މި މޮޅާއެކު އާސެނަލުން ވަނީ ލީގުގެ ދެވަނަ ހޯދައި، އެއްވަނައިގައި އޮތް ލިވަޕޫލާ ދެމެދުގައިވާ ފަރަގު ހަ ޕޮއިންޓަށް ކުޑަކޮށްފައެވެ.

މމިވަގުތު ތާވަލުގެ އެއްވަނައިގައި ލިވަޕޫލް އޮތީ 18 މެޗުން 45 ޕޮއިންޓާ އެކުގައެވެ. އާސެނަލް ދެވަނައިގައި އޮތީ 19 މެޗުން 39 ޕޮއިންޓާ އެކުގައެވެ. ތިންވަނައިގައި އޮތް ނޮޓިންހަމް ފޮރެސްޓަށް 19 މެޗުން ލިބިފައިވަނީ 37 ޕޮއިންޓެވެ.

ބްރެންޓްފޯޑްގެ ދަނޑުގައި ކުޅުނު މި މެޗުގައި ފުރަތަމަ ލީޑު ނެގީ ބްރަޔާން އެމްބުއޭމޯ ޖެހި ގޯލަކުން ބްރެންޓްފޯޑުންނެވެ. ނަމަވެސް، ފުރަތަމަ ހާފު ނިމުމުގެ ކުރިން ގަބްރިއެލް ޖީސޫސް ޖެހި ގޯލަކުން އާސެނަލުން ވަނީ އެއްވަރުކޮށްފައެވެ.

ދެވަނަ ހާފުގެ ކުރީކޮޅު އާސެނަލުން ވަނީ ތިން މިނިޓުގެ ތެރޭގައި ދެ ގޯލު ޖަހައިފައެވެ. މި ގޯލްތައް ކާމިޔާބުކޮށްދީފައި ވަނީ މިކޭލް މެރީނޯ އާއި ގަބްރިއެލް މާޓިނެލީ އެވެ.

އިނގިރޭސި ޕްރިމިއަރ ލީގު އާސެނަލް