ޕޯލްސްޓާރގެ ރިހިޔޫބީލް: ރައީސްގެ ޝުކުރު ހުރިހާ އެހީތެެރިންނަށް

ބޮޑުތިލަދުންމަތީގައި މިހާތަނަށް ބާއްވާ އެންމެ އަގުބޮޑު ފުޓުބޯޅަ މުބާރާތް މައިކަޕް، ރަވާ އިންތިޒާމު ކުރަނީ އިހަވަންދޫ ކްލަބް ޕޯލްސްޓާރ އެވެ. މިއީ 25 އަހަރު މެދުކެނޑުމެއް ނެތި އިހަވަންދޫގައި ހިންގަމުން އަންނަ މަދަނީ ޖަމްޢިއްޔާއެކެވެ.

މި އަހަރަކީ ކުލަބް ޕޯލް ސްޓާރގެ ރިހިޔޫބީލް ފާހަގަ ކުރާ އަހަރެވެ. މައިކަޕްގެ 14 ވަނަ މުބާރާތް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ޕޯލްސްޓާރގެ ރައީސް މުޙައްމަދު ޝުޖާޢު ވިދާޅުވީ މިފަދަ މުބާރާތެއް ބޭއްވިގެން މިދަނީ ވަރަށް ގިނަ ފަރާތްތަކެއްގެ އެހީތެރިކަމާ އެކު ކަމަށެވެ. އެގޮތުން މުބާރާތުގެ ޓައިޓަލް ސްޕޮންސަރ ބިއުޓިފުލް ބްލޫގެ ނަން ޝުޖާޢު ފާހަގަ ކުރެއްވިއެވެ.

މީގެ އިތުރުން މުބާރާތުގެ ހުރިހާ ސްޕޮންސަރުންނަށް ޝުޖާޢު ވަނީ ޝުކުރު ދަންނަވާފައެވެ.

މިރޭގެ ފައިނަލް މެޗްގައި ބައްދަލު ކުރަނީ އެންވީކޭ އަދި ކުޅިމަގެވެ. މިއީ މިމުބާރާތުގެ ފައިނަލްގައި އެންވީކޭ ކުޅޭ 5 ވަނަ ފަހަރެވެ. އެއީ ނަމަވެސް އެޓީމަށް މިމުބާރާތް ކާމިޔާބުކުރެވިފައިވަނީ އަދި 1 ފަހަރުއެވެ. ސަޕޯޓަރުންގެ ސްކޯ ޕްރެޑިކްޝަން އަށް ބަލާއިރު މި މުބާރާތް ކާމިޔާބު ކުރުން އެންމެ ގާތީ ކުޅިމަގެވެ.

ބިއުޓިފުލް ބްލޫ މައިކަޕް 2024، ފުޓްބޯޅަ މުބާރާތުގައި 6 ރަށަކުން 9 ޓީމް ވަނީ ބައިވެރިވެފައެވެ.  މައިކަޕްގެ ބާނީއަކީ އިހަވަންދޫ ދާއިރާގެ ކުރީގެ މެމްބަރު މުހައްމަދު އަބުދުﷲ (މުހައްމާ) އެވެ.

2007 ވަނަ އަހަރުންފެށިގެން މިހާތަނަށް މައިކަޕްގެ 13 މުބާރާތެއް ބާއްވާފައިވާއިރު، މިއީ މިސަރަހައްދުގައި ބާއްވާ އެންމެ ވަރުގަދަ އެއް މުބާރާތެވެ.  މިއަހަރު ބާއްވާ މައިކަޕް ފުޓްބޯޅަ މުބާރާތުގެ ޓައިޓަލް ސްޕޮންސަރ ކޮށްފައިވަނީ ބިއުޓިފުލް ބްލޫއެވެ. މިއަހަރުގެ މައިކަޕްގެ ޗެމްޕިއަން ޓީމަށް 100،000 ރުފިޔާ އަދި ރަނަރަޕް ޓީމަށް 35،000 ރުފިޔާގެ ފައިސާގެ އިނާމެއް ދިނުމަށް ވަނީ ނިންމައިފައެވެ.