ހުޅުމާލޭގައި ޑްރޯން ޝޯއަކާއެކު އާ އަހަރުގެ ފެސްޓިވަލް ފަށައިފި

ރޭގެ ހަރަކާތުގެ ތެރޭގައި ހަވާއެރުވުންވެސް ހިމެނޭ

ހުޅުމާލޭ ސެންޓްރަލް ޕާކުގައި ރޭ 8:00 ގައި "މޯލްޑިވްސް ކަލްޗާ އެންޑް ފުޑް ފެސްޓިވަލް" ގެ ނަމުގައި އާ އަހަރު ފެށުން ފާހަގަކުރުމަށް ބާއްވާ ޚާއްޞަ ފެސްޓިވަލެއް ފަށައިފިއެވެ.

މި ފެސްޓިވަލްގައި އާންމުކޮށް ރާއްޖޭގައި ނުފެންނަ ފަދަ ޑްރޯން ޝޯއެއް ބޭއްވުމާއެކު، ކާބޯތަކެއްޗާއި ސަގާފީ ސްޓޯލްތައް ވެސް ހިމެނެއެވެ.

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން އިންތިޒާމުކޮށްގެން ބާއްވާ މި ފެސްޓިވަލް ކުރިއަށްދާނީ މި ރޭގެ ނިޔަލަށެވެ. މި ފެސްޓިވަލްގެ މައިގަނޑު ސްޕޮންސަރަކީ އޫރިދޫއެވެ.

ފެސްޓިވަލްގެ ފުރަތަމަ ރޭ ބޭއްވުނު ޑްރޯން ޝޯގައި ރާއްޖޭގެ ސަގާފަތާއި ފަތުރުވެރިކަމާ ގުޅުން ހުރި މަންޒަރުތައް ދައްކުވައިދިނެވެ. މީގެ އިތުރުން ބޮޑުބެރުގެ ހުށަހެޅުންތަކާއި، ދަފި ނެގުން ފަދަ ސަގާފީ ހަރަކާތްތަކާއި، މަޝްހޫރު ކޮމީޑިއަން ނާޒިމް ޝިހާމް (ކާއްޓޭ) ގެ ސެގްމަންޓެއް ވެސް ގެނެސްދީފައިވެއެވެ.

އައު އަހަރަށް މަރުހަބާ ކިޔުމުގެ ގޮތުން މި ފެސްޓިވަލްގައި ހަވާއެރުވުން ވެސް ކުރިޔަށް ގެންދިޔައެވެ. އަދި ކާބޯތަކެއްޗާއި އާޓްސް އެންޑް ކްރާފްޓްސް ސްޓޯލްތަކުގައި ވަރަށް ގިނަ އަދަދެއްގެ ބަޔަކު ބައިވެރިވިއެވެ.

މިއަދު މި ފެސްޓިވަލް ކުރިޔަށްދާނީ އާއިލާތަކަށް ޚާއްސަ ގިނަ ހަރަކާތްތަކާއެކު، ހަވީރު 4:00 އިން ރޭގަނޑު 10:00 ގެ ނިޔަލަށެވެ. މިއަދުގެ ހަރަކާތްތަކުގެ ތެރޭގައި ފުލުހުންނާއި ފަޔާ ޓްރަކްގެ ހުށަހެޅުމަކާއި ކްލައިމްބިން ވޯލް އާއި ބައުންސް ހައުސް އަދި ޓްރާންސްފޯމާސް ޑިސްޕްލޭއެއް ވެސް ހިމެނެއެވެ.

އެމްއެމްޕީއާރުސީ