އެޗްޓީއެސްއަކީ ޓެރެރިސްޓް ޖަމާއަތެއް ގޮތުގައި އޮތްއޮތުން ރާއްޖެއިން ދަމަހައްޓައިފި

އެޗްޓީއެސް ޖަމާއަތުގެ ލީޑަރު އަބޫ މުޙައްމަދު އަލް ޖޮލާނީ އަދި ބައެއް ހަނގުރާމަވެރިންނާ ބައްދަލު ކުރަނީ -

ސީރިއާގައި 24 އަހަރު ވަންދެން ވެރިކަން ކުރެއްވި ބައްޝާރު އަލް އަސަދުގެ ވެރިކަން ވައްޓާލުމަށްފަހު، އެ ގައުމުގެ ވެރިކަމާ ހަވާލުވި ހަޔިއަތު ތަހުރީރް އަލް-ޝާމް (އެޗްޓީއެސް) އަކީ ޓެރެރިސްޓް ޖަމާއަތެއް ކަމުގައި ރާއްޖޭން ނިންމާފައި އޮތްއޮތުން ރާއްޖެއިން މިއަދު އަނެއްކާ ވެސް ދަމަހައްޓައިފި އެވެ.

ރައީސް އޮފީހުން ބުނީ ޓެރެރިސްޓް ޖަމާއަތްތަކުގެ ލިސްޓު އެކުލަވައިލާ އާންމު ކުރީ ޓެރަރިޒަމް މަނާ ކުރުމުގެ ގާނޫނުގެ 18 ވަނަ މާއްދާގެ (ހ) ގެ ދަށުން ގައުމީ ސަލާމަތާ ބެހޭ މަޖިލީހުގެ މަޝްވަރާގެ މަތީން ކަމަށެވެ.

އެ ގާނޫނުގެ ދަށުން އެޗްޓީއެސްއަކީ ޓެރަރިސްޓް ޖަމާއަތެއްގެ ގޮތުގައި ރާއްޖެއިން ކަނޑައެޅީ 2019 ވަނަ އަހަރެެވެ.

މިދިޔަ އަހަރުގެ އޮކްޓޯބަރު މަހުގެ ނުވަ ވަނަ ދުވަހު އާންމު ކުރި ޓެރެރިސްޓް ޖަމާއަތްތަކުގެ ލިސްޓުގައި ވެސް އެ ޖަމާއަތުގެ ނަން ހިިމަނާފައިވެ އެވެ.

ސަރުކާރުން ވަނީ ޓެރެރިސްޓް ޖަމާއަތް ތަކުގެ ލިސްޓް އަލުން މިއަދު ގެޒެޓު ކޮށްފަ އެވެ.

ނަމަވެސް މިއަހަރު ވެސް ޓެރަރިސްޓް ޖަމާއަތް ތަކުގެ ލިސްޓާއި ހަނގުރާމަވެރި ސަރަހައްދުތަކުގެ ލިސްޓަށް އެއްވެސް ބަދަލެއް ގެނެސްފައެއް ނުވެ އެވެ.

އެގޮތުން އެޗްޓީއެސްއާއެކު 20 ޖަމާއަތެއް ޓެރަރިސްޓް ޖަމާއަތްތަކުގެ ގޮތުގައި ސަރުކާރުން ކަނޑައަޅާފައިވެ އެވެ. އަދި ސީރިއާ އަށް ދިވެހިން ދަތުރު ކުރުން މަނާކޮށްފައި އޮތްއޮތުން ވެސް ރާއްޖެ އިން ވަނީ ދަމަހައްޓާފަ އެވެ.

ރައީސް އޮފީސް