ހަންގޭރީގައި ކިޔެވުމަށް 25 ސްކޮލާޝިޕް ފުރުސަތު ހުޅުވާލައިފި

މަތީ ތައުލީމަށް ކިޔެވުމަށް ޝައުގުވެރިވާ ކުދިން ވަރަށް ގިނަ

ހަންގޭރީގައި ކިޔެވުމަށް 25 ސްކޮލަރޝިޕަކަށް އެދުމުގެ ފުރުޞަތު މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވުޒާރާއިން ހުޅުވާލައިފިއެވެ.

މި ސްކޮލަރޝިޕްތަކުގައި ހިމެނެނީ ބެޗްލަރސް، މާސްޓަރސް އަދި ޕީއެޗްޑީ ފެންވަރުގެ ކޯސްތަކެވެ.

މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވުޒާރާއިން ކުރި އިޢުލާނުގައިވާ ގޮތުން، މި ސްކޮލަރޝިޕްތަކުގައި ކިޔަވަން ޖެހޭނީ ހަންގޭރީގެ ޔުނިވަރސިޓީތަކުގައެވެ. ބެޗްލަރސް ޑިގްރީއަށް 8 ފުރުޞަތު، މާސްޓަރސް ޑިގްރީއަށް 14 ފުރުޞަތު އަދި ޕީއެޗްޑީއަށް 3 ފުރުޞަތު ވަނީ ހަމަޖެހިފައެވެ.

ކޮންމެ ދަރިވަރަކަށްވެސް ހުށަހެޅޭނީ ފުލްޓައިމް އެއް ޕްރޮގްރާމަކަށެވެ. ސްކޮލަރޝިޕަށް އެދޭ ދަރިވަރުން ވުޒާރާއިން ޝޯޓްލިސްޓްކުރުމަށްފަހު، ސްކޮލަރޝިޕަށް ހޮވޭ ދަރިވަރުން ކަނޑައަޅާނީ ސްކޮލަރޝިޕް ދޭ ފަރާތުންނެވެ.

މި ސްކޮލަރޝިޕްތަކުގެ ދަށުން ދެކޮޅު ޓިކެޓާއި ވިސާގެ ޚަރަދު މަތީ ތަޢުލީމާބެހޭ ވުޒާރާއިން ހަމަޖައްސައިދޭނެއެވެ. އަދި ކޯސް ފީ، ޓިޔުޝަން ފީ، މެޑިކަލް އިންޝުއަރެންސް އަދި ދިރިއުޅުމުގެ ޚަރަދުން ބައެއް ސްކޮލަރޝިޕް ދޭ ފަރާތުން ހަމަޖައްސައިދޭނެއެވެ.

ސްކޮލަރޝިޕްތަކަށް އެދެވޭނީ މަތީ ތަޢުލީމާބެހޭ ވުޒާރާގެ މައި އެޑިޔު ޕޯޓަލް މެދުވެރިކޮށެވެ. ހުށަހެޅުންތައް ބަލައިގަތުމުގެ ސުންގަޑިއަކީ 2024 ޖެނުއަރީ 15 ވަނަ ދުވަހުގެ 14:00 އެވެ. ސްކޮލަރޝިޕްތަކުގެ ދަށުން ކިޔެވޭނެ ދާއިރާތަކާއި ޝަރުތުތައް ވުޒާރާގެ އިޢުލާނުގައި ހިމަނާފައިވާކަން ފާހަގަކުރެވެއެވެ.

މަތީ ތަޢުލީމް