މޯލްޑިވިއަނުން ގެންނަ ވައިޑް ބޮޑީ ބޯޓަށް މަރުހަބާ ކިޔަން އެއާ ޝޯއެއް

މޯލްޑިވިއަންގެ ފުރަތަމަ ވައިޑް ބޮޑީ މަތިންދާ ބޯޓަށް މަރުހަބާ ކިޔުމަށް އެއާ ޝޯއެއް ބާއްވަން ނިންމައިފި އެވެ.

ގައުމީ އެއާލައިން މޯލްޑިިވިއަނުން މިއަދު ބުނީ އެ ކުންފުނީގެ ފުރަތަމަ ވައިޑް ބޮޑީ މަތިންދާ ބޯޓަށް މަރުހަބާ ކިޔުމަށް ހާއްސަ އެއާ ޝޯއެއް ކުރިއަށް ގެންދަން ނިންމާފައިވާ ކަމަށެވެ.

މި ޝޯ ކުރިއަށް ގެންދާނީ އަންނަ ހޯމަ ދުވަހު އެވެ.

މާލެ އަދި ހުޅުމާލޭގައި މި އެއާ ޝޯ ބާއްވާނީ ހަމަ އެ ދުވަހުގެ ހަވީރު 5:00 އިން 5:30 އަށެވެ. އެއީ މާލޭގެ އުސްފަސްގަނޑުގެ އިތުރުން، ހުޅުމާލެ އެކެއް އަދި ދޭއްގެ އިރުމަތީ ފަރާތު އަތިރިމަތީ ސަރަހައްދުގަ އެވެ.

ގައުމީ އެއާލައިންގެ އޮޕަރޭޝަންތައް ފުޅާ ކުރުމަށް ވައިޑް ބޮޑީ އެއާ ކްރާފްޓް ތަކެއް ގެންނާނެ ކަމަށް ރައީސް ޑރ. މުޙައްމަދު މުއިއްޒު ވިދާޅުވީ ބަނޑޮސް ރިސޯޓްގައި މިދިޔަ އަހަރުގެ ޑިސެމްބަރު މަހުގެ މެދު ތެރޭގައި ކުރިއަށް ގެންދިޔަ ރިސޯޓްތަކުގެ ޖީއެމް ފޯރަމް ވާހަކަފުޅު ދައްކަވަމުންނެވެ.

ރައީސް އެ ފަހަރު ވިދާޅުވީ އެހާ ބޮޑެތި މަތިންދާ ބޯޓު ތަކެއް ގެނައުމުގެ މަގުސަދަކީ ޗައިނާގެ މާކެޓާއި ދުނިޔޭގެ އެކި ކަންކޮޅު ތަކުން ރާއްޖެއަށް ޒިޔާރަތް ކުރާ ޓޫރިސްޓުން އިތުރު ކުރުން ކަމަށެވެ.

އޭގެ އިތުރުން އެ އިންވެސްޓްމަންޓާއެކު މޯލްޑިވިއަން ތަރައްގީކޮށް އޮޕަރޭޝަންތައް ފުޅާކޮށް، އެ ކުންފުންޏަކީ އަނެއްކާ ވެސް ފަތުރުވެރި ކަމަށް ފައިދާ ހުރި ވިޔަފާރި އަކަށް ހެދުމުގެ އިތުރުން ގައުމީ ތަރައްގީއަށް ބޭނުންވާ އާމްދަނީ ހޯދޭނެ ކަމަށް ރައީސް ވިދާޅުވި އެވެ.

ރާއްޖެ ގެންނަނީ ދުނިޔޭގައި އުފައްދާ އެންމެ ބޮޑު އެއް ބްރޭންޑުގެ މަތިންދާ ބޯޓް ކަމުގައިވާ އެއާބަސް އޭ 330-200ގެ ވައިޑް-ބޮޑީ މަތިންދާ ބޯޓެކެވެ.