އުތުރު ގޭޓްވޭ އިން ބޭރުގެ ޔޮޓަކަށް ފުރަތަމަ ފަހަރަށް ކްލިއަރެންސް ދީފި

އިހަވަންދިއްޕޮޅުގައި، އެމްޕީއެލް އިން ގާއިމް ކޮށްފައިވާ، "އިންޓަނޭޝަލް ޝިޕް އެންޑު ޕޯޓު ސެކިއުރިޓީ ގޭޓު" އިން ބޭރުގެ ޔޮޓަކަށް ފުރަތަމަ ފަހަރަށް ކުލިއަރެންސް ހިދުމަތް ދީފި އެވެ.

މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސީއީއޯ މުޙައްމަދު ވަޖީހު މިއަދު ވިދާޅުވީ އެއީ ފަތުރުވެރިން ގޮވައިގެން ރާއްޖެ އައި ޔޮޓެއް ކަމަށެވެ.

ވަޖީހު ވިދާޅުވީ މި ދުވަސްވަރު ރާއްޖެ އަށް ފަތުރުވެރީން ގޮވައިގެން ގިނަ އަދަދަކަށް ޔޮޓު ފަހަރު ދަތުރު ކުރާނެ ކަމަށް ބެލެވޭ ކަމަށާއި އެހެންވެ، ޔޮޓު ފަހަރަށް ބޭނުންވާނޭ ފުރިހަމަ ހިދުމަތްތައް ފޯރު ކޮށްދިނުމަށް އެމްޕީއެލުން ފުރިހަމަ އަށް ތައްޔާރު ވެފައިވާ ކަމަށެވެ.

އެމްޕީއެލާއި އެސްޓީއޯ ގުޅިގެން ރާއްޖޭގެ އެންމެ އުތުރުގައި ފްލޯޓިން ބަންކަރިންގެ ހިދުމަތް ވެސް އަންނަނީ ދެމުންނެވެ.

އެ ހިދުމަތް ރަސްމީކޮށް ފަށާފައި ވަނީ މިއަހަރުގެ ސެޕްޓެމްބަރު 19 ވަނަ ދުވަހު އެވެ.

ބަންކަރިން ހިދުމަތް ފުރަތަމަ ފެށީ ދެ ބޯޓާ އެކުގަ އެވެ.

އެެއީ 3،258 ޓަނުގެ އެމްޓީ މެރިން އޭންޖަލް، އަދި 3،929 ޓަނުގެ އެމްޓީ މެރިން ބެލާ އެވެ.

ބަންކަރިންގެ ހިދުމަތުގެ ތެރެއިން، ބޯޓު ފަހަރަށް ތެޔޮ އަޅައިދިނުމާއި ފަޅުވެރީން ބަދަލު ކުރުމާއި ބޯޓު ފަހަރަށް ބޭނުންވާ ސްޕެއާ ފަދަ ސާމާނު ފޯރުކޮށްދިނުމުގެ ހިދުމަތުގެ އިތުރުން މަރާމާތު ކޮށްދިނުން އަދި ސާފު ބޯފެން ފޯރުކޮށްދޭނެ އެވެ.