ބޮންޑެޑް ވެއާ ހައުސްއަކުން ގިނަ އަދަދެއްގެ ސިނގިރޭޓް ގެއްލުނު މައްސަލަ ބަލަނީ

ރާއްޖެ އެތެރެކުރި ގިނަ އަދަދެއްގެ ސިނގިރޭޓު ތަކެއް ބޮންޑެޑް ވެއާ ހައުސް އެއްގައި ރައްކާ ކޮށްފައި ވަނިކޮށް ގެއްލުނު މައްސަލައެއް ބަލަން ފަށައިފި އެވެ.

މީޑިއާގައި ރިޕޯޓްކޮށްފައިވާ ގޮތުގައި ގެއްލިފައި ވަނީ ގާތްގަނޑަކަށް 575 ކޭސް ސިނގިރޭޓެވެ. އޭގެ ތެރޭގައި ރާއްޖޭގައި އާންމުކޮށް ބޭނުން ކުރަމުން އަންނަ ތިން ބްރޭންޑެއްގެ ސިނގިރޭޓު ވެސް ހިމެނެ އެވެ.

މި ކަމާ ގުޅުވައިގެން ހޯމް މިނިސްޓަރު އަލީ އިހުސާން ޓްވީޓާގައި ކުރެއްވި ޕޯސްޓުގައި ވިދާޅުވީ ޒަމާން ތަކެއް ވަންދެން ބޮންޑެޑް ވެއާ ހައުސްތައް މާލޭގެ އެކި ގެ ތަކުގައްޔާއި އެޕާޓްމަންޓް ތަކުގައި އައީ ހިންގަމުން ކަމަށާއި އެ ތަންތަނުގައި ދެ ތަޅު ހަރުކޮށް އެއް ތަޅުގެ ތަޅުދަނޑި ބަލަހައްޓަނީ ކަސްޓަމްސް ފަރާތުން ކަމަށެވެ.

އެމަނިކުފާނު ވިދާޅުވީ ސިނގިރޭޓް ތަކެއް ގެއްލިގެން ރިޕޯޓު ކޮށްފައި ބޮންޑެޑް ވެއާ ހައުސް އަކީ ވެސް އެ ގޮތަށް ގެ އެއްގައި ހަދާފައި ހުރި ތަނެއް ކަމަށެވެ.

ނަމަވެސް ވެރި ފަރާތުން ވެއާ ހައުސް ހިންގި ތަން ދޫކޮށް އެ ތަނުގައި އެހެން މަސައްކަތެއް ކުރަމުން އަންނަ މައުލޫމާތު ކަސްޓަމްސްއަށް ލިބުމުން އެކަން ޔަގީންކޮށް އެ ފަރާތަށް ވާނީ ވެއާ ހައުސްގައި ހުރި ކަމަށް ރެކޯޑް ތަކުން ދައްކާ މުދަލަށް ޑިއުޓީ ދެއްކުމަށް އަންގާފައިވާ ކަމަށް އިހުސާން ފާހަގަ ކުރެއްވި އެވެ.

"މިކަން ހިނި ގޮތް ބަލައި ގާނޫނީ ފިޔަވަޅު އެޅުމަށް ކަސްޓަމްސް އާއި ފުލުހުން ދަނީ ތަހުގީގު ކުރަމުން،" އިހުސާން ވިދާޅުވި އެވެ.

އިހުސާން ވިދާޅުވީ އެ ގޮތަށް ގޭގެ ތަކުގައި ބޮންޑެޑް ވެއާ ހައުސް ހިންގުމަކީ ސަލާމަތީ ގޮތުން އަދި ކޮންޓްރޯލް ކުރުމަށް އެންމެ ރަނގަޅު ގޮތް ކަމަށް ނުފެންނާތީ މި ސަރުކާރުން ވާނީ ބޮންޑެޑް ވެއާ ހައުސް ދެން ހިންގޭނީ ހަމަ އެކަނީ "ކަސްޓަސްގެ ފުލް ކޮންޓްރޯލް" އޮންނަ ސަރުހައްދު ތަކުގައި އެކަނި ކަމަށް ކަނޑަ އަޅައި އެ ސިޔާސަތު ތަންފީޒު ކުރަން ފަށާފައި ކަމަށެވެ.