59 ފަހަރު ހައްޔަރުކުރި މީހަކު ފިހާރައެއް ފަޅާލައި ފޯނުތަކެއް ވަގަށް ނަގައިފި

މީގެ ކުރިން އެކި މައްސަލަތަކާ ގުޅުވައިގެން 59 ފަހަރު ހައްޔަރު ކޮށްފައިވާ މީހަކު ފިހާރައެއް ފަޅާލައި ފޯނުތަކެއް ވަގަށް ނަގައިފި އެވެ.

މާފަންނުގައި ހުންނަ "ސްޕައި އެންޑް ޓެކް" މޯބައިލް ފިހާރަ ދޮރު ހަލާކުކޮށްލައިގެން ވަދެ އެ ފިހާރައިން ވައްކަން ކޮށްފައިވާ މައްސަލަ ފުލުހުންނަށް ހުށަހެޅީ މިމަހުގެ 26 ވަނަ ދުވަހުގެ 4:00ހާއިރު އެވެ.

މި ވައްކަމުގެ ތުހުމަތުގައި ހައްޔަރުކޮށްފައިވަނީ ރ. މީދޫ، ބުލްބުލާގެ، އަޒްމީލް މުޙައްމަދު 40، އެވެ.

ފުލުހުން ބުނީ އޭނާ ހައްޔަރުކޮށް، ބަލައި ފާސް ކުރިއިރު އެފިހާރައިން ވަގަށް ނަގާފައިވާ ކަމަށް ބެލެވޭ ފަސް ފޯނު ފެނިފައިވާ ކަމަށެވެ.

މި މައްސަލައިގައި ހައްޔަރު ކުރި އަޒްމީލަކީ 2024 ވަނަ އަހަރުގެ އޮކްޓޯބަރު ހަ ވަނަ ދުވަހުގެ ވަގުތެއްގައި "ކްރޭވެސް ޓޭކްއަވޭ" ރެސްޓޯރަންޓުން ވައްކަން ކޮށްފައިވާ މައްސަލައާ ގުޅިގެން ކުށް ސާބިތުވެފައިވާ މީހެކެވެ.

އަޒްމީލް މުޙައްމަދު އަށް ވަނީ އެ މައްސަލައިގައި ފަސް މަހާއި 22 ދުވަހަށް ގޭބަންދު ކުރުމަށް މިދިޔަ ނޮވެމްބަރު މަހުގެ ހަ ވަނަ ދުވަހު ކްރިމިނަލް ކޯޓުން ހުކުމްކޮށްފަ އެވެ.

އޭނާ އަކީ މީގެ ކުރިން އެކި މައްސަލަތަކާ ގުޅިގެން 59 ފަހަރެއްގެ މަތިން ހައްޔަރުކޮށްފައިވާ، މަސްތުވާތަކެތި ބޭނުންކުރުމާއި ވައްކަމާއި ފޭރުމުގެ ކުށުގެ ރެކޯޑްސް އޮންނަ މީހެއް ކަމަށް ފުލުހުން ބުނެފައިވެ އެވެ.

ސްޕައި އެންޑް ޓެކް މޯބައިލް ފިހާރަ ފަޅާލައިގެން ވައްކަން ކުރި މައްސަލައިގައި އަޒްމީލްގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން 15 ދުވަހުގެ ބަންދުގެ މުއްދަތެއް ދީފައިވެ އެވެ.