ގޭބަންދުގައި ހުރި މީހަކު ވައްކަމުގެ އިތުރު މައްސަލައެއްގައި ހައްޔަރުކޮށްފި

ހައްޔަރުކުރެވުނު މީހާ / ފޮޓޯ: ޕޮލިސް

ވައްކަމުގެ މައްސަލައެއްގައި ކުށް ސާބިތުވެ ގޭބަންދުގައި ހުރި މީހަކު ވައްކަމުގެ އިތުރު މައްސަލައެއްގައި ދިވެހި ފުލުހުންގެ ޚިދުމަތުން ހައްޔަރުކޮށްފިއެވެ.

ހައްޔަރުކޮށްފައިވަނީ ރ. މީދޫ، ބުލްބުލްގެ، އުމުރުން 40 އަހަރުގެ އަޒްމީލް މުޙައްމަދު އެވެ.

ފުލުހުން ވިދާޅުވީ މާފަންނުގައި ހުންނަ "ސްޕައި އެންޑް ޓެކް" މޯބައިލް ފިހާރައިގެ ދޮރު ހަލާކުކޮށްލައިގެން މި މަހުގެ 26 ވަނަ ދުވަހުގެ ފަތިހު 4:00 ހާއިރު އެފިހާރައިން ވައްކަން ކޮށްފައިވާ މައްސަލައިގައި އަޒްމީލް ހައްޔަރުކޮށްފައިވާ ކަމަށެވެ. އޭނާ ބަލައިފާސްކުރިއިރު ވަގަށް ނަގާފައިވާކަމަށް ބެލެވޭ 5 ފޯނު ފެނިފައިވާ ކަމަށް ފުލުހުން ވިދާޅުވިއެވެ.

އަޒްމީލަކީ މިދިޔަ މަހުގެ 6 ވަނަ ދުވަހު "ކްރޭވެސް ޓޭކްއަވޭ" ރެސްޓޯރަންޓުން ވައްކަން ކުރި މައްސަލައެއްގައި ކުށް ސާބިތުވެ 5 މަހާއި 22 ދުވަހަށް ގޭބަންދުކުރުމަށް ހުކުމްކޮށްފައިވާ މީހެކެވެ. އޭނާއަކީ މީގެކުރިންވެސް އެކި މައްސަލަތަކާ ގުޅިގެން 59 ފަހަރެއްގެ މަތިން ހައްޔަރުކޮށްފައިވާ މީހެއް ކަމަށާއި މަސްތުވާތަކެތި ބޭނުންކުރުމާއި ވައްކަމާއި ފޭރުމުގެ ކުށުގެ ރެކޯޑު އޮންނަ މީހެއް ކަމަށްވެސް ފުލުހުން ވިދާޅުވިއެވެ.

މި އެންމެ ފަހުގެ މައްސަލައާ ގުޅިގެން އަޒްމީލް މުޙައްމަދުގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 15 ދުވަހުގެ ބަންދުގެ މުއްދަތެއް ދީފައިވާ ކަމަށް ފުލުހުން ވިދާޅުވިއެވެ. މި މައްސަލައިގެ ތަޙުޤީޤު ފުލުހުން ދަނީ ކުރިއަށް ގެންދަމުންނެވެ.

ފުލުހުން