އިޕްސްވިޗް އަތުން މޮޅުވެ އާސެނަލް ލީގުގެ ދެ ވަނައަށް އަރައިފި

އިނގިރޭސި ޕްރިމިއާ ލީގުގައި ރޭ ކުޅުނު މެޗުން އިޕްސްވިޗް ޓައުން 1-0 އިން ބަލިކޮށް އާސެނަލުން ލީގުގެ ދެ ވަނަ އަށް ޖެހިލައިފި އެވެ.

އާސެނަލްގެ އެމިރޭޓްސް ސްޓޭޑިއަމްގައި ކުޅުނު މި މެޗުގައި އެ ޓީމުގެ ހަމައެކަނި ލަނޑު ޖެހީ ކައި ހަވާޓްޒް އެވެ.

މި ކާމިޔާބީއާ އެކު، އާސެނަލުން 18 މެޗުން 36 ޕޮއިންޓް ހޯދައި ލީގުގެ ދެވަނައަށް ޖެހިލި އިރު، ލީގުގެ އެއް ވަނައިގައި އޮތް ލިވަޕޫލަށް 17 މެޗުން 42 ޕޮއިންޓް ލިބިފައިވާ ވެއެވެ. އަދި ތިން ވަނައިގައި އޮތް ޗެލްސީ އަށް ވަނީ 18 މެޗުން 35 ޕޮއިންޓް ލިބިފަ އެވެ.

އާސެނަލްގެ ކޯޗު މިކޭލް އާޓެޓާ ވަނީ ރޭގެ މި މޮޅަކީ އަނިޔާގެ މައްސަލަތަކުގެ ސަބަބުން ޓީމު އުނދަގޫ ހާލަތެއްގައި އޮއްވައި ލިބުނު މުހިންމު މޮޅެއް ކަމަށް ބުނެފަ އެވެ. ނަމަވެސް، ސީޒަނުގައި ކުރިއަށްދާއިރު ގޯލު ޖަހަން ލިބޭ ފުރުސަތުތަކުގެ ބޭނުން މި އަށް ވުރެ ރަނގަޅަށް ހިފަން ޖެހޭ ކަމަށް އޭނާ ފާހަގަކުރި އެވެ.

އާސެނަލްގެ ތަރި ބުކާޔޯ ސަކާގެ ފަލަމަސްގަނޑަށް ލިބުނު އަނިޔާ އިން ރަނގަޅުވުމަށް އޮޕަރޭޝަނެއް ކޮށްފައިވާ ކަމަށާއި، އޭނާ އެނބުރި އަންނަން ދެ މަހަށް ވުރެ ދިގު މުއްދަތެއް ނެގުމުގެ ފުރުސަތު ބޮޑު ކަމަށް އާޓެޓާ ވަނީ ހާމަކޮށްފަ އެވެ.