އިޒްރޭލްގެ ކެބިނެޓް މިނިސްޓަރަކު އަލް އަގްސާއަށް ވަދެގަތުން ދިވެހި ސަރުކާރުން ކުށްވެރި ކޮށްފި

އިޒްރޭލްގެ ގައުމީ ސަލާމަތާބެހޭ ވަޒީރު އިޓަމަރް ބެން-ގްވީރް، ފަލަސްތީނުގެ އަލް ގުދުސްގައި ހުންނަ މުސްލިމުންގެ ތިން ވަނަ ހަރަމްފުޅު، އަލް މަސްޖިދުލް އަގްސާ އަށް ވަދެގަތުން ދިވެހި ސަރުކާރުން ކުށްވެރި ކޮށްފި އެވެ.

ބެން-ގްވީރް، އަގްސާ މިސްކިތަށް ވަދެގަތީ މިދިޔަ ބުރާސްފަތި ދުވަހު އެވެ.

ފޮރިން މިނިސްޓްރީން ނެރުނު ނޫސްބަޔާނެއްގައި ބުނީ އޭނާގެ އެ އަމަލަކީ އިސްލާމީ މުގައްދަސް ބިނާތަކުގެ ހުރުމަތްކަނޑައިލުމަށް ތަކުރާރުކޮށް އިޒްރޭލުން ކުރަމުންދާ އަމަލެއް ކަމަށެވެ.

މިފަދަ އަމަލުތަކަކީ ބައިނަލްއަގުވާމީ ގާނޫނާ ކަނޑައެޅިގެން ހިލާފު އަމަލުތަކެއްކަން ފާހަގަކޮށް ފޮރިން މިނިސްޓްރީން ބުނީ މި އަމަލަކީ ފަލަސްތީނު ރައްޔިތުންނާއި ދުނިޔޭގެ ދެ ބިލިއަނަށްވުރެ ގިނަ މުސްލިމުންގެ ހައްގުތަކަށް ވެސް އަރައިގަތުން ކަމަށެވެ.

މިފަދަ އަނިޔާވެރި އަމަލުތައް ހިންގުން ހުއްޓުވުމަށާއި ބައިނަލްއަގުވާމީ ގާނޫނު ތަކަށާއި އިންސާނީ ހައްގު ތަކަށް އިހުތިރާމު ކުރުން ކަށަވަރު ކުރުމަށް ހަރުދަނާ، އަވަސް ފިޔަވަޅު ތަކެއް އެޅުމަށް ބައިނަލްއަގުވާމީ މުޖުތަމަ އަށް މިނިސްޓްރީން ގޮވައިލާފައި ވެއެވެ.

މިނިސްޓްރީން ބުނެފައި ވަނީ ފަލަސްތީނު މައްސަލައަށް ދެމެހެއްޓެނިވި، ސުލްހަވެރި ހައްލެއް ގެނެވޭނީ 1967 ވަނަ އަހަރުގެ ކުރިން އޮތް އިން ތަކުގެ މައްޗަށް ބިިނާކޮށް އިރުމަތީ ގުދުސަކީ ފަލަސްތީނުގެ ވެރިކަން ކުރާ ރަށް ކަމުގައި ކަނޑަ އަޅައި، އެއީ މިނިވަން، މުސްތަގިއްލު އަދި އަމިއްލަ ސިޔާދަތީ ބާރު ހިނގާ ދައުލަތެއްގެ ގޮތުގައި ފަލަސްތީނުގެ ދައުލަތް ގާއިމު ކުރެވުމުން ކަމަށެވެ.

އަގްސާ މިސްކިތަކީ އިސްލާމުންގެ ތިން ވަނައަށް އެންމެ މުގައްދަސް ބިނާ އެވެ. މި މިސްކިތަކީ މިއުރާޖްގެ ރޭގައި ކީރިތި ރަސޫލާ (ސއވ) ނަމާދު ކުރެއްވި މިސްކިތެވެ.

ޔަހޫދީ ދައުލަތުގެ ބާރުގެ ދަށުގައި އޮންނަ މަސްޖިދުލް އަގްސޯގެ ގާނޫނީ ބެލެނިވެރި ފަރާތަކީ އުރުދުން ސަރުކާރެވެ.