ޤުރުއާން ހިތުދަސްކުރާ ފަރާތްތަކަށް ސަނަދު ދިނުން ރޯދަމަހު ބާއްވަނީ

ކީރިތި ޤުރުއާން ހިތުދަސްކުރާ ފަރާތްތަކަށް ސަނަދު ދިނުމަށް ބާއްވާ ޚާއްސަ ހަފްލާ ކޮންމެ އަހަރެއްގެވެސް ރަމަޟާންމަހުގެ 27 ވަނަ ރޭ ބޭއްވުމަށް ނިންމާފައިވާކަމަށް އިސްލާމީ ކަންތައްތަކާބެހޭ ވަޒީރު ޑރ. މުހައްމަދު ޝަހީމް އަލީ ސަޢީދު ވިދާޅުވެއްޖެއެވެ.

މި ހަފްލާގައި ދަސްވެނިވާ ފަރާތްތަކަށް ޚާއްސަ ޤައުނެއް ތައްޔާރުކުރާނެ ކަމަށްވެސް ވަޒީރު ހާމަކުރެއްވިއެވެ.

ރާއްޖޭގައި ޙާފިޡުންގެ އަގުވަޒަންކުރުމުގެ ގޮތުން ރައީސުލްޖުމްހޫރިއްޔާގެ ޚާއްސަ މެޑެއްޔާއި ހަނދާނީ ލިޔުމާއި އިނާމު ދެއްވަމުން ގެންދަވައެވެ. މިގޮތުން، އޮކްޓޯބަރ 2022 އިން ސެޕްޓެންބަރު 2024 ގެ ނިޔަލަށް ޤުރުއާން ހިތުދަސްކޮށްގެން ސަނަދު ހާސިލުކުރި 28 ޙާފިޡުންނަށް މިއަހަރު މި ޚާއްސަ އިނާމު ދެވިފައިވެއެވެ.

ވަޒީރު ޝަހީމް ވިދާޅުވިގޮތުގައި މިހާރުވެސް 3 މީހަކު ޤުރުއާން ހިތުދަސްކުރުމަށްފަހު އިމްތިހާނު ހަދަމުންދާ އިރު، އިތުރު 2 މީހަކު އިމްތިހާނު ހެދުމަށް އެދިފައިވެއެވެ. އަދި ފަސް އަހަރުގެ ކުޑަކުއްޖަކުވެސް ޤުރުއާން ހިތުދަސްކުރުމަށްފަހު މުރާޖަޢާ ކުރުމަށް އެދިފައިވާކަން ފާހަގަކުރެއްވިއެވެ.

މީގެއިތުރުން، ސަރުކާރުން ވަނީ ކީރިތި ޤުރުއާން ހިތުދަސްކުރާ ފަރާތްތައް ޢުމްރާއަށް ފޮނުވުމުގެ މަޝްރޫޢެއްވެސް މިއަހަރު ފަށާފައެވެ. މި ހުރިހާ މަސައްކަތްތަކަކީ ރާއްޖޭގައި ޤުރުއާން ހިތުދަސްކުރުމުގެ ދާއިރާ ކުރިއެރުވުމަށް ކުރެވޭ މުހިންމު މަސައްކަތްތަކެކެވެ.