ސުނާމީ ކާރިސާގެ ހަނދާނުގައި މުޅި ރާއްޖޭގައި ސުކޫތެއް

ގައުމީ އެއްބައިވަންތަކަމުގެ ދުވަސް ފާހަގަކުރުމުގެ ގޮތުން، 2004 ވަނަ އަހަރުގެ ސުނާމީ ކާރިސާގައި ނިޔާވި އަދި ގެއްލުނު މީހުންގެ ހަނދާނުގައި މިއަދު ހެނދުނު މުޅި ރާއްޖޭގައި ސުކޫތެއް ގެނެވިއްޖެއެވެ.

މި ސުކޫތު ގެނެވުނީ ސުނާމީގެ ރާޅު ރާއްޖެއަށް އެރިކަމަށް ރިކޯޑުކުރެވިފައިވާ ގަޑިކަމުގައިވާ ހެނދުނު 9:23 ގައެވެ.

ވެރިރަށް މާލޭގައި ސުކޫތުގެ ރަސްމިއްޔާތު ބޭއްވުނީ ކުރީގެ ހުރަވީ ބިލްޑިންގ ހުރި ބިމުގައެވެ. މި ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއި، ދައުލަތުގެ ވަޒީރުންނާއި އިސްވެރިން ބައިވެރިވިއެވެ. މީގެ އިތުރުން، އެ ސަރަހައްދުގައި ހުންނަ ސަރުކާރުގެ އޮފީސްތަކުގެ މުވައްޒަފުންނާއި މާލޭގެ އެހެނިހެން އޮފީސްތަކުގެ މުވައްޒަފުންވެސް މި ސުކޫތުގައި ބައިވެރިވިއެވެ.

ރާއްޖޭގެ އެހެން ރަށްރަށުގައިވެސް މި ސުކޫތު ފާހަގަކުރެވުނެވެ. ރަށްރަށުގެ ރައްޔިތުން މި ސުކޫތުގައި ބައިވެރިވެ، ސުނާމީގައި ގެއްލުނު އަދި ނިޔާވި މީހުންގެ ހަނދާން އާކޮށްފައިވެއެވެ.

ސުކޫތު ނިމުމާއެކު، މުޅި ރާއްޖޭގައި އެއްބައިވަންތަކަމުގެ އަތުގުޅާލުމެއް ކުރިއަށް ގެންދިއުމަށް ހަމަޖެހިފައިވެއެވެ. އަދި ހަދިޔާ ބަދަލުކުރުމުގެ ޚާއްޞަ ހަރަކާތެއްވެސް ރޭވިފައިވާކަމަށް އިސްވެރިން މަޢުލޫމާތު ދެއްވިއެވެ.

2005 ވަނަ އަހަރުން ފެށިގެން، ކޮންމެ އަހަރެއްގެ ޑިސެމްބަރު 26 ވަނަ ދުވަސް ފާހަގަކުރަމުން އަންނަނީ ދިވެހިންގެ އެއްބައިވަންތަކަމުގެ ދުވަހުގެ ގޮތުގައެވެ. މި ދުވަސް ފާހަގަކުރުމުގެ މައިގަނޑު މަޤްޞަދަކީ ސުނާމީގައި ގެއްލުނު މީހުންގެ ހަނދާން އާކުރުމާއި، އެ ދުވަހު ދިވެހިން ދެއްކި އެއްބައިވަންތަކަމުގެ ރޫޙު ދަމަހައްޓައި، އާލާކުރުމެވެ.