ރާއްޖޭގައި ބިދޭސީ އަންހެނަކު ރޭޕްކޮށް މަރާލިކަމުގެ ޚަބަރު ދޮގުކޮށްފި

ރާއްޖޭގައި ބިދޭސީ އަންހެނަކު ރޭޕްކޮށް މަރާލިކަމަށް ދެކެވޭ ވާހަކަ ދޮގުކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު އަލީ އިހުސާން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި މިވަނީ ރާއްޖޭގައި ބިދޭސީ އަންހެނަކު ރޭޕްކޮށް މަރާލިކަމަށް ސޯޝަލް މީޑިއާގައި ބަޔަކު މީހުން ފަތުރަމުން ދިއުމާއި ގުޅިގެންނެވެ.  

ވަޒީރު އިހުސާން އެކްސްގައި ކުރެއްވި ޕޯސްޓެއްގައި ވިދާޅުވީ، ސޯޝަލް މީޑިއާގައި ދައުރުވަމުންދާ ވީޑިއޯއަކީ 2021 ވަނަ އަހަރުގެ މޭ މަހު ބަންގްލަދޭޝްގެ ނޫހެއްގައި ރިޕޯޓުކޮށްފައިވާ ހާދިސާއަކާ ގުޅޭ ވީޑިއޯއެއް ކަމަށެވެ. އަދި އެ އާޓިކަލްގެ ލިންކުވެސް ވަނީ ހިއްސާކުރައްވާފައެވެ.

މި ވާހަކަ ސޯޝަލް މީޑިއާގައި ދައުރުވާން ފެށުމާ ގުޅިގެން ވަޒީރު އިހުސާންގެ އިތުރުން ފުލުހުންވެސް ވަނީ މި ވާހަކަ ދޮގުކޮށްފައެވެ. މިފަދަ ދޮގު މަޢުލޫމާތު ފެތުރުމަކީ މުޖުތަމަޢުގައި ބިރުވެރިކަން އުފެދި، އޮޅުންއަރާފަދަ ކަމެއްކަން ފާހަގަކުރެވެއެވެ.

ރަސްމީ ފަރާތްތަކުން މި ޚަބަރު ދޮގުކުރުމާއެކު، އާންމުންނަށް އިލްތިމާސްކުރެވެނީ މިފަދަ ޚަބަރުތައް ފެތުރުމުގެ ކުރިން އޭގެ ޞައްޙަކަން ކަށަވަރުކުރުމަށެވެ. އަދި ރަސްމީ ފަރާތްތަކުން ދޭ މަޢުލޫމާތަށް ރިޢާޔަތްކުރުމަށެވެ.