ފެނަކައިގެ މެނޭޖިން ޑިރެކްޓަރު މުއާޒް އިސްތިއުފާ ދެއްވައިފި

ފެނަކައިގެ މެނޭޖިން ޑިރެކްޓަރު މުއާޒް މުޙައްމަދު ރަޝީދު އެ މަގާމުން މިއަދު އިސްތިއުފާ ދެއްވައިފި އެވެ.

އޭނާ މިއަދު ޓްވިޓާގައި އާންމު ކުރެއްވި އިސްތިއުފާގެ ސިޓީގައި ބުނެފައިވަނީ އޭނާ އިސްތިއުފާދެއްވުމަށް ނިންމެވީ ކުންފުންޏަށް ލިބޭ އާމްދަނީއަށް ވުރެ ހަރަދު ބޮޑުވެ، ދެމެހެއްޓެނިވި ގޮތެއްގައި ހިދުމަތް ނުދެވޭ ހާލަތަކަށް ކުންފުނި ގޮސްފައިވާތީ ކަމަށެވެ.

މުއާޒްގެ ސިޓީގައި ފާހަގަ ކުރައްވާފައިވާ ގޮތުގައި ހަމައެކަނި ކުންފުންޏަށް ލިބޭ އާމްދަނީން ކުންފުނި ހިންގަންޖެހޭއިރު، ތަނުގެ މާލީ ހާލަތު ގޮސްފައިވާ ހިސާބުން އެކަން ނުކުރެވޭނެ ކަމަށެވެ.

އެކަން މެދުވެރިވާ ސަބަބެއްގެ ގޮތުގައި އޭނާ ފާހަގަ ކުރައްވާފައިވަނީ:

1. ކަރަންޓާއި، ފެނާ، ނަރުދަމާގެ ވަސީލަތްތައް މިހާތަނަށް މެއިންޓެއިންކޮށްފައި ނެތުމުން އޮތް ބެކްލޮގް ރަނގަޅުނުކުރެވުން

2. ކުންފުންޏާ ހަވާލުވި އިރު 4.3 ބިލިއަން ރުފިޔާގެ ދަރަނި އޮތުން

3. ކުންފުންޏަށް ބޭނުންވާ ވަރަށް ވުރެ އެތައް ގުނައެއް އިތުރަށް ވަޒީފާ ހަމަޖައްސަން ޖެހުން

4. ކުންފުނި ރައިޓް ސައިޒް ކުރުމަށް ކަމާ ގުޅުންހުރި އިދާރާތަކުން އެކަށީގެންވާ އެއްބާރުލުމެއް ނުލިބުން

5. ކުންފުންޏަށް ލިބޭ އާމްދަނީއަށް ވުރެ ކުރަންޖެހޭ ހަރަދު އިންތިހާއަށް އިތުރުވުން

މުއާޒް ވިދާޅުވީ، ކަން އެހެން ހުރި ނަމަވެސް، އޭނާ މަގާމުގައި ހުންނެވި އެއް އަހަރުގެ ތެރޭ ކުންފުނީގެ ހިންގަން ދިމާވި ގޮންޖެހުންތަކާއި ދަތިތަކާއެކުގައި ވެސް 160 މިލިއަން ރުފިޔާއަށް ވުރެ ބޮޑު އަދަދެއް ހިންގުމުގެ ހަރަދުން ސަލާމަތް ކުރެވިފައިވާ ކަމަށެވެ.

ނަމަވެސް، ކުންފުނި މިހާރު އޮތް ހާލަތުން ހަމައެކަނި ހަރަދު ކުޑަކޮށްގެން އަރައި ނުގަނެވޭނެ ކަމަށް އޭނާ ވިދާޅުވި އެވެ.

ފެނަކައިގެ މުވައްޒަފުންނަށް މިދިޔަ އޮކްޓޫބަރު މަހާއި، ނޮވެންބަރު މަސް ފެށުނުއިރު، މުސާރަ ދެވިފައި ނުވާކަން ފާހަގަކޮށް މުއާޒު ވިދާޅުވެފައިވަނީ މިއީ ކުންފުނީގެ ހާލަތު މިހާ ދަށަށް ދިޔަ ފުރަތަމަ ފަހަރުކަމަށެވެ.

އޭނާ ވިދާޅުވީ، ކުންފުނީ ހަމަ މަގަށް އެޅުވުމަށް ހެދި ޕްލޭންތައް ކަމާބެހޭ ފަރާތް ތަކަށް ހިއްސާ ކުރި ނަމަވެސް އެކަމުގައި މިހާތަނަށް އަލިމަގެއް ފެނިފައި ނުވާ ކަމަށެވެ. އަލި ފިނޭންސް މިނިސްޓްރީއާ އެކު މަޝްވަރާކޮށްފައިވާ ކަމަށް ވެސް ބުންޏެވެ.