މޯލްޑިވިއަންގެ ވައިޑް ބޮޑީ އޮޕަރޭޝަންތައް ފުރަތަމަ ފަށާނީ ޗައިނާގެ 3 މަންޒިލަކަށް

ޤައުމީ އެއަރލައިން، މޯލްޑިވިއަންއަށް އަލަށް ގެންނަ ވައިޑް ބޮޑީ އެއަރކްރާފްޓްގެ އޮޕަރޭޝަންތައް ފުރަތަމަ ފަށާނީ ޗައިނާގެ ތިން މަންޒިލަކަށް ކަމަށް އެ ކުންފުނިން ހާމަކޮށްފިއެވެ.

މި ތިން މަންޒިލަކީ ޝެންހާއި، ޗެންޑޫ އަދި ބެއިޖިންގ އެވެ.

މޯލްޑިވިއަންގެ ފުރަތަމަ ވައިޑް ބޮޑީ އެއަރކްރާފްޓް އަންނަ މަހުގެ 7 ވަނަ ދުވަހު ރާއްޖެ ގެނެވޭނެ ކަމަށް އެ ކުންފުނިން ބުނެއެވެ. މިހާރު އެ އެއަރކްރާފްޓް އޮތީ ސިންގަޕޫރުގައި ކަމަށާއި، އޭގެ އައު ލިވަރީގެ މަސައްކަތްތައް ކުރިއަށްދާ ކަމަށް ވެސް ބުނެއެވެ.

މޯލްޑިވިއަންގެ ޑެޕިއުޓީ މެނޭޖިންގ ޑިރެކްޓަރ ޢަލީ ސަލީމް ވިދާޅުވީ ވައިޑް ބޮޑީގެ އޮޕަރޭޝަންތަކާއެކު އަހަރަކު 60،000 ފަސިންޖަރުން ރާއްޖެ ގެނެވޭނެ ކަމަށް ލަފާކުރެވޭ ކަމަށެވެ. މިއީ ކުންފުންޏަށް މާލީ ގޮތުން ވެސް ލިބޭނެ ބޮޑު ކުރިއެރުމެއް ކަމަށް އޭނާ ފާހަގަކުރެއްވިއެވެ.

މޯލްޑިވިއަންގެ ޗީފް ސްޓްރެޓިޖިސްޓް މުޙައްމަދު ސައްފާޙް ވިދާޅުވީ ޗައިނާގެ ތިން ސިޓީއަށް ހަފްތާއަކު ތިން ދަތުރު ކުރުމަށް ކަނޑައަޅާފައިވާ ކަމަށެވެ. އަދި ޔޫރަޕަށް ވެސް އޮޕަރޭޝަންތައް ފެށުމަށް ނިންމާފައިވާ ކަމަށް އޭނާ ވިދާޅުވިއެވެ.

މި އެއަރކްރާފްޓަކީ 264 މީހުންގެ ޖާގައިގެ މަތިންދާބޯޓެކެވެ. އޭގައި އިކޮނޮމީ ކްލާސް، ބިޒްނަސް ކްލާސް އަދި ޕްރިމިއަމް ކްލާސްގެ ޚިދުމަތް ލިބެން ހުންނާނެ ކަމަށް މޯލްޑިވިއަނުން ބުނެއެވެ.