އެޗްޑީސީގެ އައު އެމްޑީއަކަށް މައުރޫފް ޖަމީލު އައްޔަނުކޮށްފި

މައުރޫފް ޖަމީލް

ކޮރަޕްޝަނާއި ހިޔާނާތުގެ ގިނަ މައްސަލަތަކެއް ތަޙުޤީޤު ކުރަމުންދާ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރުގެ މަޤާމަށް މައުރޫފް ޖަމީލު އައްޔަނުކޮށްފިއެވެ.

މައުރޫފް އެ މަޤާމަށް އައްޔަންކޮށްފައި މިވަނީ ކުރީގެ އެމްޑީ އިބްރާހިމް ފަޒުލް ރަޝީދު އިސްތިއުފާ ދިނުމާ ގުޅިގެންނެވެ.

ފަޒުލްގެ އިސްތިއުފާ ދީފައިވަނީ ހުޅުމާލޭން ބިން ދޫކުރުމާއި ވިނނަރެސް ފްލެޓު ދޫކުރުމާ ގުޅޭ ކޮރަޕްޝަނުގެ ބޮޑެތި މައްސަލަތަކެއް ފެންމަތިވެފައިވަނިކޮށެވެ. މި މައްސަލަތަކާ ގުޅިގެން ފަޒުލްގެ ޕާސްޕޯޓު ވަނީ ހިފަހައްޓާފައެވެ.

މައުރޫފް ޖަމީލަކީ މި ސަރުކާރުން އެކުލަވާލި ހައުސިން ކޮމިޓީގެ މެންބަރެކެވެ. އޭނާއަކީ އާކިޓެކްޓެއް ކަމަށްވާއިރު، ހުޅުލޭ ފަޅު ހިއްކައި ހުޅުމާލެ ތަރައްޤީކުރުމުގެ ޕްރޮޖެކްޓުގައި އިސް ދައުރެއް އަދާކުރައްވާފައިވާ ބޭފުޅެކެވެ.

މައުރޫފްގެ ތަޖުރިބާގެ ތެރޭގައި ކޮންސްޓްރަކްޝަން އެންޑް ޕަބްލިކް އިންފްރާސްޓްރަކްޗަރ މިނިސްޓަރުކަމާއި، އެޗްޑީސީ އާއި އެޗްޑީއެފްސީގެ މުހިންމު މަޤާމުތަކެއް އަދާކުރައްވާފައިވުން ހިމެނެއެވެ. އަދި އޭނާއަކީ އާކިޓެކްޗަރ ހެރިޓޭޖުގެ ދާއިރާއިން މިހާރުވެސް ގިނަ މަސައްކަތްތަކެއް ކުރައްވަމުންދާ ބޭފުޅެކެވެ.

އެޗްޑީސީގެ އައު އެމްޑީ އައްޔަނުކޮށްފައިވާއިރު، "ބިންވެރިޔާ" މަޝްރޫޢާ ގުޅުން ހުރި މައްސަލަތަކަކާއި، ހުޅުމާލޭ ފޭސް 2 އިން ނުއަގުގައި ބިންތަކެއް ވިއްކި ކަމުގެ ތުހުމަތުތަކެއް ވަނީ ފެންމަތިވެފައެވެ. ނަމަވެސް، އެޗްޑީސީން ބުނެފައިވަނީ އުސޫލުން ބޭރުން އެއްވެސް ބިމެއް ވިއްކާފައި ނުވާ ކަމަށެވެ.

އެޗްޑީސީ