ބިއުޓިފުލް ބުލޫ މައިކަޕް: އިރަމާއިން ސެންސިޓީ ކޮޅަށް ލަނޑު ގޯންޏެއް

ކްލަބް ޕޯލްސްޓާއިން އިންތިޒާމުކޮށްގެން ބޮޑުތިލަދުންމަތީގައި ބާއްވާ އެންމެ އަގުބޮޑު ފުޓުބޯޅަ މުބާރާތް “މައިކަޕް”ގެ ފުރަތަމަ މެޗް ބޮޑު ތަފާތަކުން ކުލަބް އިރަމާއިން ކާމިޔާބު ކޮށްފިއެވެ.

އެގޮތުން މިއަދު ހަވީރު ކުރިއަށް ދިޔަ މެޗްގައި ކުލަބު އިރަމާއިން ވަނީ ސެންސިޓީ ކޮޅަށް 8 ލަނޑުޖަހާ ފަސޭހަ ކަމާއެކު މުބާރާތުގެ ފުރަތަމަ 3 ޕޮއިންޓް ހޯދާފައެވެ.

މެޗް ފެށިގެން ނިމެންދެންވެސް މުޅި މެޗް ކޮންޓްރޯލް ކޮށްފައިވަނީ އިރަމާއިންނެވެ. އިރަމާއެއް ގޯލަށް ނުރައްކާވާނެ އެންމެ ޙަމަލާއެއްވެސް ސެންސިޓީއަށް އުފެއްދިފައެއް ނުވެއެވެ. މެޗްގެ ފުރަތަމަ ހާފްގައި 6 ލަނޑު ކާމިޔާބު ކުރިއިރު، ދެވަނަ ހާފްގައި ވަނީ 2 ލަނޑު ކާމިޔާބުކޮށްފައެވެ. ސެންސިޓީއަށް އެންމެ ލަނޑެއްވެސް ކާމިޔާބު ކުރެވިފައެއް ނުވެއެވެ.

މިއަދުގެ މެޗްގައި ކްލަބު އިރަމާގެ މުޙައްމަދު އަޙްމީމް އާއި ސާނިޢުގެ އިތުރުން ޝާފިޢު (ކޮރާ)ގެ މޮޅު ކުޅުމެއް ފެނިގެން ގޮސްފައިވާއިރު، މިއަދުގެ މެޗްގައި ގިނަ ލަނޑުތަކެއް ކާމިޔާބު ކޮށްދިނުމުގައި މި 3 ކުޅުންތެރިން ވަނީ މުޙިއްމު ދައުރެއް އަދާކޮށްފައެވެ. ކުޅުންތެރިންނެވެ.

މިއަދުގެ މެޗްގެ މޮޅު ކުޅުންތެރިއަކަށް ހޮވިފައިވަނީ ޝާފިޢު އެވެ.

ކުލަބު އިރަމާގެ ދެވަނަ މެޗްގައި ބައްދަލު ކުރާނީ ކުޅިމަގާ ދެކޮޅަށެވެ. މި މެޗް ކުޅުމަށް ހަމަޖެހިފައިވަނީ 24 ވަނަ ދުވަހުގެ ރޭ 8:15 ގައެވެ. ސެންސިޓީގެ ދެވަނަ މެޗްގައި ނިކުންނާނީ އެންވީކޭއާ ދެކޮޅަށެވެ.

މިއަދުގެ މެޗްގައި ލަނޑުޖެހި ކުޅުންތެރިން:

ސާޖިދު - 1

ޝާފިއު - 2

ސާނިއު - 2

އަޙްމީމް - 1

ސަމީރު - 2

މިއަދުގެ މެޗްގެ މޮޅު ކުޅުންތެރިޔާއަށް ޓްރޮފީ ހަވާލުކުރުން

މި މުބާރާތަށް ކުލަބު އިރަމާއިން ވަރަށް ބޮޑަށް ތައްޔާރުވެފައިވާއިރު، އެ ޓީމުގައި އިޖިޕްޓަށް ނިޞްބަތްވާ ކުޅުންތެރިއަކުވެސް ހިމެނެއެވެ. މީގެ އިތުރުން މިހާތަނަށް އިހަވަންދޫގައި އުފެދުނު އެންމެ މޮޅު ކުޅުންތެރިންގެ ތެރޭގައި ހިމެނޭ މުޙައްމަދު ސާނިއު (ސާންޓޭ)، އިބްރާހިމް ޝިފާޒް (ޝިފަރޭ)، ޙަސަން ޒަކީ، މުޙައްމަދު ރިޝްފާން (ރިޗަޑޭ)ގެ އިތުރުން މޫސާ ވަޙީދު ހިމެނެއެވެ. އަދި އިހަވަންދޫ ސުކޫލު ގުރޭޑް 10 ގައި ތަޢުލީމު ޙާސިލް ކުރަމުންދާ ދެ ދަރިވަރުން ކަމުގައިވާ ޙަސަން ނިޔާޒް އާއި ޙުސައިން ސުހާން ހިމެނެއެވެ. މިއީ އިހަވަންދޫގައި ފުޓުބޯޅައިގައި ވިދަމުން އަންނަ ދެ ކުޅުންތެރިންނެވެ.

މައިކަޕްގެ ބާނީއަކީ އިހަވަންދޫ ދާއިރާގެ ކުރީގެ މެމްބަރު މުހައްމަދު އަބުދުﷲ (މުހައްމާ) އެވެ.  2007 ވަނަ އަހަރުންފެށިގެން މިހާތަނަށް މައިކަޕްގެ 13 މުބާރާތެއް ބާއްވާފައިވާއިރު، މިއީ މިސަރަހައްދުގައި ބާއްވާ އެންމެ ވަރުގަދަ އެއް މުބާރާތެވެ.  މިއަހަރު ބާއްވާ މައިކަޕް ފުޓްބޯޅަ މުބާރާތުގެ ޓައިޓަލް ސްޕޮންސަރ ކޮށްފައިވަނީ ބިއުޓިފުލް ބްލޫއެވެ.

ބިއުޓިފުލް ބްލޫއިން މުބާރާތުގެ ފޯރި ގަދަކުރުމަށް ތަފާތު ހަރަކާތްތަކެއް ކުރިޔަށް ގެންދާނެކަންވަނީ އިއުލާންކޮށްފައެވެ. މިއަހަރުގެ މައިކަޕްގެ ޗެމްޕިއަން ޓީމަށް 100،000 ރުފިޔާ އަދި ރަނަރަޕް ޓީމަށް 35،000 ރުފިޔާގެ ފައިސާގެ އިނާމެއް ދިނުމަށް ވަނީ ނިންމައިފައެވެ.