އެމްޑަބްލިޔުއެސްސީގެ ޑީއެމްޑީ ފަޒީލް ރަޝީދު ވެސް ސަސްޕެންޑުކޮށްފި

އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު --

ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް، ގޯތި ދޫކޮށްފައިވާ ކަމަށް ތުހުމަތު ކުރެވޭ މައްސަލައާ ގުޅުވައިގެން އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓާ މުޙައްމަދު ފަޒީލް ރަޝީދު ސަސްޕެންޑުކޮށްފި އެވެ.

އެޗްޑީސީގެ އެމްޑީ ފަޒުލް ރަޝީދުގެ ބޭބެ، ފަޒީލަކީ ހުޅުމާލެއިން ގޯތި ލިބުނު، ބިންވެރިޔާ ސްކީމުގައި ނަން ނުހިމެނޭ ފަރާތެކެވެ. އޭނައަކީ އެ ސްކީމުގެ ޝަރުތު ފުރިހަމަވާ މީހެއް ނޫންކަމަށް އޮތީ ކަނޑައަޅާފަ އެވެ.

މި މައްސަލައާ ގުޅުވައިގެން އެމްޑަބްލިއުއެސްސީން ބުނީ އެޗްޑީސީ އާއި ގުޅޭގޮތުން ފުލުހުން ކުރިޔަށް ގެންދާ ތަހުގީގަށް ފުރިހަމަޔަށް އެހީތެރިވުމުގެ ގޮތުން އެ ކުންފުނީގެ ޑީއެމްޑީ މުޙައްމަދު ފަޒީލް ރަޝީދު މިއަދުން ފެށިގެން ހުރިހާ ޒިންމާ ތަކަކުން ވަކިކޮށް އޮފީހަށް ނުނިކުމެވޭ ގޮތަށް ސަސްޕެންޑް ކުރެވިފައިވާ ކަމަށެވެ.

މިދިޔަ އަހަރު ނެރުނު ބިންވެރިޔާ ސްކީމްގެ ފައިނަލް ލިސްޓުގައި ފަޒީލްގެ ނަން އޮތް ނަމަވެސް އޭނާގެ ޝަރުތު ހަމައެއް ނުވެ އެވެ. އެއީ ސަރުކާރުން ހިންގައިފައިވާ އަސާސީ ބޯހިޔާވަހި ކަމުގެ ސްކީމަކުން އޭނާއަށް މީގެ ކުރިން ގޯއްޗެއް ލިބިފައި އޮތުމެވެ.

މި މައްސަލަ ހޫނުވުމާއެކު އެޗްޑީސީން ރޭ ބޭއްވި ނޫސްވެރިންގެ ބައްދުލުވުމުގައި ފަޒުލް ވިދާޅުވެފައިވަނީ އެކަމުގައި އޭނާގެ މަސްލަހަތެއް ނެތް ކަމަށެވެ. އަދި އޭނާގެ ބޭބެއާ ގުޅޭ ގޮތުން އެފަދަ މައްސަލައެއް ފެންމަވުމަކީ އިއްތިފާގެއް ކަމަށެވެ.

އެ މައްސަލައިގައި ޕީސީބީން ވަނީ އެޗްޑީސީ ގެ ޗެއާމަން ފިޔަވާ ބޯޑުގެ ހުރިހާ މެެންބަރުން ސަސްޕެންޑު ކޮށްފަ އެވެ.

އެމްޑަބްލިއުއެސްސީ