ރެއާލް މެޑްރިޑުން ފީފާ އިންޓަކޮންޓިނެންޓަލް ކަޕް ކާމިޔާބުކޮށްފި

ރެއާލް މެޑްރިޑުން ވަނީ ގިނަ މުބާރާތްތަކެއް ކާމިޔާބުކޮށްފައި

ގަތަރުގެ ލުސައިލް ސްޓޭޑިއަމްގައި ރޭ ކުޅެވުނު ފީފާ އިންޓަކޮންޓިނެންޓަލް ކަޕްގެ ފައިނަލްގައި މެކްސިކޯގެ ޕަޗޫކާ އަތުން 3-0 އިން މޮޅުވެ، ރެއާލް މެޑްރިޑުން މި މުބާރާތުގެ ޗެމްޕިއަންކަން ކާމިޔާބުކޮށްފައެވެ.

މިއީ ފީފާއިން މީގެ ކުރިން އަހަރަކު އެއް ފަހަރު ބާއްވަމުން އައި ކްލަބް ވޯލްޑް ކަޕްގެ ބަދަލުގައި މިއަހަރު ބޭއްވި މުބާރާތެކެވެ.

މެޗުގެ ފުރަތަމަ ލަނޑު ޖެހީ ރެއާލް މެޑްރިޑްގެ ކީލިއަން އެމްބާޕޭއެވެ. ދެވަނަ ހާފު ފެށިގެން އައިތާ އަށް މިނެޓުގެ ތެރޭގައި ރޮޑްރީގޯ ވަނީ ރެއާލްގެ ލީޑު ފުޅާކޮށްދީފައެވެ. އަދި މެޗުގެ 84 ވަނަ މިނެޓުގައި ވިނީޝިއުސް ޖޫނިއާ ވަނީ ޕެނަލްޓީއަކުން ރެއާލަށް ތިންވަނަ ލަނޑެއް ވެސް ކާމިޔާބުކޮށްދީ މި ތަށި ކަށަވަރުކޮށްދީފައެވެ.

ފީފާއިން ނިންމާފައިވަނީ އިންޓަކޮންޓިނެންޓަލް ކަޕް ކޮންމެ އަހަރަކު ބާއްވާއިރު، ފަސް ބައްރުގެ ޗެމްޕިއަނުން ކުޅޭ ފޯމެޓަށް މި މުބާރާތް ގެންދިއުމަށެވެ. އެހެންކަމުން، މި ތަށި އެންމެ ފުރަތަމަ ކާމިޔާބުކުރި ޓީމަކީ ދުނިޔޭގެ އެންމެ ކާމިޔާބު ފުޓްބޯޅަ ކްލަބް ކަމަށްވާ ރެއާލް މެޑްރިޑެވެ.

މި މުބާރާތަކީ އަންނަ އަހަރު ފީފާ ކްލަބް ވޯލްޑް ކަޕް 32 ޓީމާއެކު ފެށުމަށް ނިންމާފައިވާތީ، އޭގެ ކުރިން ބޭއްވި ޚާއްޞަ މުބާރާތެކެވެ.

ރިއަލް މެޑްރިޑް