ބިންވެރިޔާ ސްކީމްގެ ގޯތި ދިނުމުގައި ޤާނޫނާ ޚިލާފު ކަމެއް ކޮށްފައި ނުވާނެ: އެޗްޑީސީ
އެޗްޑީސީގެ މެނޭޖިންގ ޑިރެކްޓަރ އިބްރާހިމް ފަޒުލް ރަޝީދު
ބިންވެރިޔާ ސްކީމްގެ ދަށުން ހުޅުމާލެއިން ގޯތިތައް ހަވާލުކުރުމުގައި ޤާނޫނާ ޚިލާފަށް އެއްވެސް ކަމެއް ކޮށްފައި ނުވާނެ ކަމަށް އެޗްޑީސީގެ މެނޭޖިންގ ޑިރެކްޓަރ އިބްރާހިމް ފަޒުލް ރަޝީދު ވިދާޅުވެފައިވެއެވެ.
ފަޒުލް މިފަދައިން ވިދާޅުވެފައި ވަނީ މީޑިއާގައި ފެތުރެމުންދާ ބައެއް ޚަބަރުތަކާ ގުޅިގެން ނޫސްވެރިންނަށް މަޢުލޫމާތު ދެއްވަމުންނެވެ.
ފަޒުލް ރަޝީދު ވިދާޅުވީ ބިންވެރިޔާ ސްކީމްގެ ދަށުން ގޯތި ލިބޭނެ ފަރާތްތައް ކަނޑައަޅަނީ ހައުސިންގ މިނިސްޓްރީން ކަމަށާއި، އެ މިނިސްޓްރީން ގޯތި ދޭން ނިންމާފައިނުވާ އެއްވެސް ފަރާތަކަށް އެޗްޑީސީން ގޯތި ދީފައި ނުވާނެ ކަމަށެވެ.
މީޑިއާގައި މިހާރު ފެތުރެމުންދާ ގޯތީގެ މައްސަލައަކީ އެޗްޑީސީން ފާހަގަކޮށް، ކަމާބެހޭ ފަރާތްތަކަށް ހުށަހެޅި މައްސަލައެއް ކަމަށް ފަޒުލް ވިދާޅުވިއެވެ. އޭނާ ވިދާޅުވީ އެޗްޑީސީއަށް މައްސަލަ ފާހަގަވީ ދެ ގޯއްޗެއްގައި ކަމަށާއި، އެކަމާ ގުޅިގެން ބަލަންޖެހޭ ކަންކަން ބެލުމަށް ހައުސިންގ މިނިސްޓްރީއަށް ހުށަހެޅީ އެޗްޑީސީން އިސްނަގައިގެން ކަމަށެވެ.
މި މައްސަލަ ފުލުހުން ތަޙުޤީޤުކުރަމުންދާއިރު، އެޗްޑީސީގެ ފުރިހަމަ އެއްބާރުލުން މުއައްސަސާތަކަށް ލިބޭނެ ކަމަށް ފަޒުލް ވިދާޅުވިއެވެ. އަދި އެޗްޑީސީން ޤާނޫނާ ޚިލާފަށް އެއްވެސް ކަމެއް ކޮށްފައި ނޯންނާނެ ކަމުގެ ފުރިހަމަ ޔަޤީންކަން އޮތް ކަމަށްވެސް އޭނާ ވިދާޅުވިއެވެ.ޅުވިއެވެ.
ފަޒުލް އިތުރަށް ވިދާޅުވީ ގޯތިތައް ހަވާލުކުރުމުގައި އަމިއްލަ މަޞްލަޙަތު ގެންގުޅުނު ކަމަށް ބުނެ ދައްކާ ވާހަކަތަކަކީ ސިޔާސީ މަންފާއަށް ބަޔަކު ފަތުރާ ދޮގު ވާހަކަތަކެއް ކަމަށެވެ. އަދި ޖަވާބުދާރީވާން ނުކެރޭ ފަދަ އެއްވެސް ކަމެއް ކޮށްފައި ނުވާނެ ކަމަށްވެސް އޭނާ ވިދާޅުވިއެވެ.
ކޮމެންޓް