އެމްއެންޔޫއިން އޮކިއުޕޭޝަނަލް ތެރަޕިސްޓުން ތަމްރީނުކުރަން ފަށަނީ

އެއްބަސްވުމުގައި ސޮއިކުރުން / ފޮޓ::އެމްއެންޔޫ

ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) އާއި އޮކިއުޕޭޝަނަލް ތެރަޕީ އެސޯސިއޭޝަން މޯލްޑިވްސް ގުޅިގެން، ގައުމަށް ބޭނުންވާ އޮކިއުޕޭޝަނަލް ތެރަޕިސްޓުން ތަމްރީނުކުރުމަށް އެއްބަސްވުމެއްގައި ސޮއިކޮށްފިއެވެ.

އެމްއެންޔޫގައި ބޭއްވުނު ރަސްމިއްޔާތުގައި، އެސޯސިއޭޝަންގެ ފަރާތުން ޗެއަރޕާސަން އާމިނަތު ތޫހާ އަދުލީ ސޮއިކުރެއްވި އިރު، ޔުނިވަރސިޓީގެ ފަރާތުން ސޮއިކުރައްވފައި ވަނީ ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމް އެވެ.

އެމްއެންޔޫއިން ހާމަކުރި ގޮތުގައި، މިހާރު ރާއްޖޭގައި މަސައްކަތްކުރަނީ އެންމެ ތިން ދިވެހި އޮކިއުޕޭޝަނަލް ތެރަޕިސްޓުންނެވެ. އެހެންކަމުން، މި ދާއިރާއަށް ބޭނުންވާ ފަންނީ ޚިދުމަތްތެރިން ތަމްރީނުކުރުމަކީ ޔުނިވަރސިޓީން އިސްކަންދޭ ކަމެކެވެ.

ޔުނިވަރސިޓީން ފަރުމާކޮށްފައިވާ ހަތަރު އަހަރުގެ އޮކިއުޕޭޝަނަލް ތެރަޕީ ޑިގްރީ ކޯހަކީ ބައިނަލްއަޤްވާމީ މިންގަނޑުތަކަށް ފެތޭ، ދާއިރާގެ ފަންނީ ބޭފުޅުންގެ ލަފާގެ މަތިން އެކުލަވާލާފައިވާ ކޯހެކެވެ. މި ކޯހަކީ ފެކަލްޓީ އޮފް ހެލްތު ސައިންސްގެ ފުރަތަމަ ބައިނަލްއަޤްވާމީ ގޮތުން އެކްރެޑިޓް ކުރެވޭ ކޯސް ކަމަށްވެސް އެމްއެންޔޫއިން ބުނެފައިވެއެވެ.

މި ކޯހުގެ ސަބަބުން ދަރިވަރުންނަށް އިންޑަސްޓްރީއާ ގާތް ގުޅުމެއް އުފެދި، އަމަލީ ތަޖުރިބާ ހޯދުމުގެ ފުރުޞަތު ލިބޭނެ ކަމަށް އެމްއެންޔޫއިން ފާހަގަކޮށްފައިވެއެވެ. އަދި ކޯހުގެ ތައްޔާރީތައް ދަނީ ކުރިއަށް ކަމަށާއި، އަންނަ އަހަރުގެ ދެވަނަ ޓާމުގައި ކޯސް ފެށުމަށް އަމާޒުކުރާ ކަމަށްވެސް ބުނެފައިވެއެވެ.

އެމްއެންޔޫ