ސައިބަރ ކުށްތައް ހުއްޓުވުމަށް ތިން ޤާނޫނަކަށް އިސްލާހު ގެނެސް ރައީސް ތަސްދީގުކުރައްވައިފި

ސައިބަރ ކްރައިމް ނުވަތަ ސައިބަރ ސްޕޭސްގައި ހިންގާ ކުށްތައް ހުއްޓުވުމަށް ޤާނޫނުތަކަށް ގެނައި އިސްލާހުތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަސްދީގުކުރައްވައިފިއެވެ.

މި އިސްލާހުތައް ގެނެވިފައިވަނީ ދިވެހިރާއްޖޭގެ ޤާނޫނުލްޢުޤޫބާތާއި ޖިނާއީ މައްސަލަތަކުގައި ޤާނޫނީ އެހީތެރިކަން ބަދަލުކުރުމުގެ ޤާނޫނުގެ އިތުރުން ޖިނާއީ އިޖުރާއަތުގެ ޤާނޫނަށެވެ.

ދިވެހިރާއްޖޭގެ ޤާނޫނުލްޢުޤޫބާތަށް ގެނައި އިސްލާހުގެ ދަށުން، ސައިބަރ ސްޕޭސްގައި ހިންގާ ކުށްތަކަކީ ޤާނޫނުން ކުށެއް ކަމުގައި ކަނޑައަޅުއްވައި ސައިބަރކްރައިމްގެ ގޮތުގައި ޤާނޫނުލްޢުޤޫބާތުގައި ހިމެނޭ ކުށްތައް އިތުރުކުރެވުނެވެ. މީގެ ތެރޭގައި ހުއްދަ ނެތި ކޮމްޕިއުޓަރ ސިސްޓަމަކަށް އެކްސެސްވުމާއި، ކޮމްޕިއުޓަރ ޑޭޓާ އިންޓަސެޕްޓް ކުރުމާއި، ސައިބަރ ވަޔަލަންސްގެ އަމަލުތައް ހިމެނެއެވެ.

ޖިނާޢީ އިޖުރާއަތުގެ ޤާނޫނަށް ގެނައި އިސްލާހުގެ ދަށުން، ކަފާލާތުގެ ނިޒާމު އިތުރަށް ހަރުދަނާކޮށް ފުރިހަމަކުރުމަށްޓަކައި އުސޫލުތަކެއް ކަނޑައަޅާފައިވެއެވެ. އަދި ސައިބަރ ކުށްތައް ތަޙްޤީޤުކޮށް ދަޢުވާ އުފުލުމުގައި ޢަމަލުކުރާނެ އިޖުރާއީ އުސޫލުތައް ކަނޑައަޅާފައިވެއެވެ.

ޖިނާއީ މައްސަލަތަކުގައި ޤާނޫނީ އެހީތެރިކަން ބަދަލުކުރުމުގެ ޤާނޫނަށް ގެނައި އިސްލާހުގެ ދަށުން، އިލެކްޓްރޯނިކް ހެކި ހޯދުމާ ގުޅޭގޮތުންނާއި، ކޮމްޕިއުޓަރ ސިސްޓަމެއްގައި ރައްކާކޮށްފައި ހުންނަ ޑޭޓާ އަވަސް ގޮތެއްގައި ޕްރިޒަރވްކުރުމާ ގުޅޭ އުސޫލުތައް ކަނޑައަޅާފައިވެއެވެ.

މި އިސްލާހުތަކުގެ ސަބަބުން ސައިބަރ ކުށްތައް ހުއްޓުވުމަށް ޤާނޫނީ ނިޒާމު އިތުރަށް ހަރުދަނާވެ، ޤާނޫނު ތަންފީޒުކުރާ އިދާރާތަކަށް އިތުރު ބާރުތަކެއް ލިބިގެންދާނެއެވެ. މި ތިން ބިލު ތަސްދީގު ކުރެއްވުމާއެކު މިހާރު ވަނީ ގެޒެޓުކޮށްފައެވެ.