އިންޑިއާއަށް ގެއްލުންވާގޮތަށް ލަންކާގެ ބިން ބޭނުން ނުކުރާނެކަމުގެ ޔަގީންކަން ޑިސަނަޔަކަ ދެއްވައިފި

އިންޑިއާއަށް ގެއްލުންވާ ގޮތަށް އެއްވެސް ކަމެއް ކުރުމަށް ސްރީ ލަންކާގެ ބިން ބޭނުން ނުކުރެވޭނެ ކަމުގެ ޔަގީންކަން ސްރީ ލަންކާގެ ރައީސް އަނޫރާ ކުމާރާ ޑިސަނަޔަކަ ދެއްވައިފިއެވެ.

މި ޔަގީންކަން އޭނާ ދެއްވާފައި ވަނީ އިންޑިއާއަށް މިހާރު ކުރައްވަމުންގެންދަވާ ދަތުރުފުޅުގައި ވެރިރަށް ނިއު ދިއްލީގައި އިންޑިއާގެ ބޮޑު ވަޒީރު ނަރެންދުރާ މޯދީއާ ބައްދަލުކުރެއްވުމުގައެވެ.

މި ބައްދަލުކުރެއްވުމުގައި ޑިސަނަޔަކަ ވަނީ މީގެ ދެ އަހަރު ކުރިން ލަންކާއަށް ކުރިމަތިވި ބޮޑު އިގްތިސާދީ ގޮންޖެހުންތަކުގައި އިންޑިއާއިން ދިން އެހީތެރިކަމުގެ އަގުވަޒަންކުރައްވާ ކަމަށް ވިދާޅުވެފައެވެ. އަދި ދެ ގައުމުން ވަނީ ޑަބަލް ޓެކްސް ނެގުން ހުއްޓުވުމަށާއި ދެ ގައުމުގެ މެދުގައި ގާބިލްކަން އިތުރުކުރުމަށް ކުރާ މަސައްކަތްތައް އިތުރުކުރަން އެއްބަސްވުންތަކުގައި ސޮއިކޮށްފައެވެ.

މޯދީ ވިދާޅުވި ގޮތުގައި މި ދަތުރުފުޅުގެ ސަބަބުން ދެ ގައުމުގެ ގުޅުން ވަނީ އިތުރަށް ވަރުގަދަވެފައެވެ. މީގެ އިތުރުން، ދެ ގައުމުގެ މެދުގައި ހަކަތައާއި ޑިޖިޓަލް އަދި ފިޒިކަލް ކަނެކްޓިވިޓީގެ އިތުރުން އިންވެސްޓްމަންޓުތައް ކުރިއެރުވުމަށް މަސައްކަތްކުރައްވާނެ ކަމަށް މޯދީ ވަނީ ވިދާޅުވެފައެވެ.

ބައްދަލުވުމުގައި ދެ ގައުމުގެ ދިފާއީ އެއްބަސްވުންތަކުގެ އިތުރުން ހައިޑްރޮގްރަފީގެ މަސައްކަތްތަކާ މެދު މަޝްވަރާ ކުރުމާއި ސަމްޕޫރު ސޯލާ ޕަވާ ޕްރޮޖެކްޓާއި، ލަންކާގެ އެތެރޭގެ ރޭލު ޚިދުމަތް، އަދި ދެ ގައުމުގެ ފެރީއާއި ވައިގެ ދަތުރުފަތުރުގެ ޚިދުމަތް ފަދަ މައުޟޫއުތަކަށްވެސް އަލިއަޅުވާލެވުނެވެ. އަދި މޯދީ ވަނީ ކަނޑުގެ ސަލާމަތާއި ސައިބާ ސެކިއުރިޓީއާއި ޓެރަރިޒަމާ ދެކޮޅަށް ކުރާ މަސައްކަތްތަކާ ގުޅޭ ގޮތުން މަޝްވަރާކުރުމުގެ މުހިންމުކަންވެސް ފާހަގަކުރައްވާފައެވެ.

މިއީ ޑިސަނަޔަކަ ރައީސްކަމާ ހަވާލުވެވަޑައިގަތުމަށްފަހު ބޭރުގެ ގައުމަކަށް ކުރެއްވި ފުރަތަމަ ދަތުރުފުޅެވެ. ޑިސަނަޔަކަ ވެރިކަމަށް ވަޑައިގަތީ ލަންކާ ބަނގުރޫޓުވެ އިގްތިސާދީ ކާރިސާއެއް ކުރިމަތިވުމުން އުފެދުނު ހަމަނުޖެހުންތަކުގައި އޭރުގެ ރައީސް ގޯޓާބަޔަ ރާޖަޕަކްސަ މަގާމުން އިސްތިއުފާ ދެއްވިތާ ދެ އަހަރު ފަހުން ބޭއްވި އިންތިޚާބުގައެވެ.