ހަސަން ކުރުސީގެ އެކްސް އެކައުންޓު ސަސްޕެންޑު ކުރުމާއެކު އޮންލައިން ކެމްޕޭނެއް

ދިވެހީންގެ މެދުގައި މަގުބޫލު، އެކްސް އެކައުންޓު ހަސަން ކުރުސީ، އެކްސް އިން ސަސްޕެންޑު ކުރުމާ ގުޅުވައިގެން އޮންލައިން ކެމްޕެއިނެއް ފަށައިފި އެވެ.

މިއީ ހޭޝްޓެގް #ބްރިންގްބެކްއެޗްކުރުސީ ނަމުގައި އޭނާއަށް ތާއީދު ކުރާ މީހުން ސޯޝަލް މީޑިޔާގައި ހިންގައި ކެމްޕެއިނެކެވެ.

ސާޅީސް ހާހަށްވުރެ ގިނަ ފޮލޯވަރުން ތިބި މި އެކައުންޓު އާންމުންގެ މެދުގައި މަޝްހޫރުކަން ހޯދާފައި ވަނީ ފާއިތުވި ރިޔާސީ އިންތިހާބާއި މަޖިލިސް އިންތިހާބުގެ ދުވަސްވަރެވެ.

މީގެ ކުރިންވެސް ހަސަން ކުރުސީ ސަސްޕެންޑް ކޮށްފައިވެ އެވެ. ނަމަވެސް މިއީ އެންމެ ގިނަ ވަގުތަށް މި އެކައުންޓް ޑިއެކްޓިވޭޓް ކުރި ފުރަތަމަ ފަހަރެވެ.

އެކައުންޓް ސަސްޕެންޑު ކުރުމުގެ ފަހަތުގައި ވަނީ ސަރުކާރާއި ސަޕޯޓަރުން ކަމަށް އޭނާއަށް ތާއީދުކޮށް ކެމްޕެއިން ކުރާ މީހުން ތުހުމަތުކުރެ އެވެ. އަދި ކުރުސީގެ އެކައުންޓަކީ ކަރަޕްޝަންގެ އަމަލުތައް ފަޅާއަރުވާ އެފަދަ ކަންކަން ހުއްޓުވުމަށް މުހިންމު އެކައުންޓެއް ކަމަށް އެ މީހުން ބުނެއެވެ.

އެ އެކައުންޓް ސަސްޕެންޑް ކުރުމަކީ ސަރުކާރާ ދެކޮޅު މީހުންގެ އަޑު ކަނޑުވާލައި ގާނޫނު އަސާސީން ލިބިދީފައިވާ ހިޔާލު ފައުޅު ކުރުމުގެ މިނިވަން ކަމަށް ހުރަސް އެޅުމުގެ އަމަލެއް ކަމަށް އެފަރާތް ތަކުން ސިފަކުރެ އެވެ.

މިއެކައުންޓަކީ ސާބިތުނުހިފޭ މައުލޫމާތު ފަތުރާ އެކައުންޓެއް ކަމަށް ސަރުކާރަށް ތާއީދު ކުރާ ފަރާތް ތަކުން ތުހުމަތު ކުރެ އެވެ.

ސަރުކާރު ސަޕޯޓަރުން ބުނަނީ މި އެކައުންޓް ސަސްޕެންޑު ކުރަން މިހާރު މާ ލަސް ވެއްޖެ ކަމަށެވެ.

އެމީހުން ބުނާ ގޮތުގައި ކުރުސީއަކީ މުޖުުތަމައު ތެރޭގައި ފިތުނަ ފަސާދަ އުފައްދައި ގައުމުގެ މަސްލަހަތު ނަގާލަން މަސައްކަތް ކުރާ އެކައުންޓެކެވެ.

ސާބިތު ނުހިފޭ ދޮގު ވާހަކަ ފެތުރުމާއި މީހުންގެ ޒާތީ މައުލޫމާތު ހާމަ ކުރުމުގައި ކުރުސީ، 24 ގަޑިއިރު މަސައްކަތް ކުރާ ކަމަށް ވެސް ސަރުކާރު ސަޕޯޓަރުން ބުނެ އެވެ.

ކުރުސީ އެކައުންޓް ހުއްޓުވުމަށް ސަރުކާރުންނާއި ސިޔާސީ ފަރާތް ތަކުން ކުރިން ވެސް މަސައްކަތްކޮށްފައިވެ އެވެ. އަދި ހަސަން ކުރުސީއަކީ ކާކުކަން ދެނެގަތުމަށް ޓަކައި ފުލުހުން އަންނަނީ ތަހުގީގެއް ހިންގަމުންނެވެ.

ހަސަން ކުރުސީ އަކީ ރައީސް ނަޝީދު ކަމަށް ސިޔާސީ ބޭފުޅުން ތުހުމަތު ކުރައްވާއިރު، އަނެއްބައި މީހުން ބުނަނީ އެ ނަމުގައި އެކައުންޓެއް ހިންގަނީ ނަޝީދުގެ ދަރިކަނބަލުން މީރާ ކަމަށެވެ.

ފުލުހުން ކުރަމުން އަންނަ ތަހުހީގަށް ވެސް ހަސަން ކުރުސީއަކީ ކާކުކަން އަދި މިހާތަނަށް ދެނެގަނެވިފައެއްނުވެ އެވެ.