ރައްޔިތުންނަށް އެންމެ ފުރިހަމަ ހިދުމަތެއް ފޯރުކޮށްދިނުމަށް ރައީސް އެދިވަޑައިގެންފި

ތިން ވުޒާރާގައި ހިނގި އަލިފާނުގެ ހާދިސާގައި ގެއްލުނު ތަކެތީގެ އަގު ނުކުރެވޭނެ ކަމަށާއި  ނަމަވެސް، އައު ހިތްވަރަކާއި އަޒުމަކާއެކު އެ ހާދިސާއިން އަރައިގަނެ ރައްޔިތުންނަށް އެންމެ ފުރިހަމަ ޚިދުމަތެއް ދިނުމަށް މަސައްކަތްކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދި ވަޑައިގަންނަވައިފިއެވެ.

ދަރުބާރުގޭގައި މިހާރު ހިންގަމުންދާ ތިން ވުޒާރާއަށް ވަޑައިގެން މުވައްޒަފުންނާ ބައްދަލުކުރައްވާ ރައީސް ވިދާޅުވީ މި ހާދިސާއަކީ ހުރިހާ މުވައްޒަފުންނަށް ވެސް ވަރަށް ހިތްދަތިކަން ގެނުވި ހާދިސާއެއް ކަމަށެވެ. އަދި މި ހާދިސާގައި މަސައްކަތުގެ ވަރަށް ގިނަ މަޢުލޫމާތުތަކާއި މުވައްޒަފުންގެ އަމިއްލަ ތަކެތި ވެސް ގެއްލިގެން ގޮސްފައިވާ ކަމަށް ފާހަގަކުރެއްވިއެވެ.

ރައީސް ވިދާޅުވީ ހުރިހާ މުވައްޒަފުން ވެސް ހިތްވަރުކޮށްގެން ކުރިއަށް ދާންޖެހޭ ކަމަށެވެ. އަދި ރައްޔިތުންނަށް އެއްވެސް ޚިދުމަތެއް މެދުނުކެނޑި ފޯރުކޮށްދޭންޖެހޭ ކަމަށް ވިދާޅުވެ، މުވައްޒަފުންގެ ކެތްތެރިކަމާއި ހިތްވަރަށް ޝުކުރު އަދާކުރެއްވިއެވެ.

ދާއިމީ ހައްލެއްގެ ގޮތުން، ސަރުކާރުގެ އިމާރާތެއްގައި މި ވުޒާރާތައް ހިންގުމަށް މަސައްކަތް ފަށާފައިވާ ކަމަށް ރައީސް ވިދާޅުވިއެވެ. އަދި މުވައްޒަފުންނަށް ބޭނުންވާ ވަސީލަތްތައް ވީހާވެސް އަވަހަކަށް ހަމަޖެއްސުމުގެ މަސައްކަތް ކުރަމުންދާ ކަމަށް ވެސް ވިދާޅުވިއެވެ.

ކެތްތެރިކަމާއި އެކުވެރިކަމާއެކު، އެއް ޓީމެއްގެ ގޮތުގައި ހިތްވަރާއެކު ކުރިއަށް ދިއުމަށް ރައީސް މުވައްޒަފުންނަށް ނަސޭހަތްތެރިވެ ވަޑައިގެންނެވިއެވެ. އަދި ގެއްލުނު މަޢުލޫމާތުތައް އަލުން އެއްކުރުމަށް މަސައްކަތްކުރަމުންދާ ކަމަށް ވެސް ވިދާޅުވިއެވެ.