ތައިލެންޑުގައި ހުންނަވާ ދިވެހި ސަފީރަކަށް ފުއާދު ކަނޑައަޅައި، ފަތްކޮޅު އަރުވައިފި

ރައީސް ޑރ. މުޙައްމަދު މުއިއްޒު، ތައިލެންޑަށް ރާއްޖެއިން ކަނޑައަޅުއްވާފައި ހުންނަވާ ސަފީރު ކަމަށް، މައްޗަންގޮޅި ތަޅަމުދިގެ، ފުއާދު ތައުފީގު މިއަދު އައްޔަން ކުރައްވައިފި އެވެ.

ފުއާދަށް މަގާމުގެ ފަތްކޮޅު ރައީސް ދެއްވީ، މިކަމަށް ޓަކައި މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވި ރަސްމިއްޔާތެއްގަ އެވެ.

ސަރުކާރަށް 35 އަހަރު ހިދުމަތް ކުރައްވާފައިވާ ފުއާދު ސަފީރު ކަމަށް، އައްޔަނު ކުރެއްވުމުގެ ކުރިން ހުންނެވީ މިނިސްޓްރީ އޮފް ފޮރިން އެފެއާޒްގެ އެމްބަސެޑާ އެޓް ލާޖުގެ މަގާމުގަ އެވެ. އޭނާއަކީ އިލެކްޝަންސް ކޮމިޝަންގެ ރައީސްކަމުގެ މަގާމު ވެސް ފުރުއްވާފައިވާ ބޭފުޅެކެވެ.

ފުއާދު އީސީގެ މެންބަރު ކަމަށް އެންމެ ފުރަތަމަ އައްޔަން ކުރެއްވީ އައު ގާނޫނޫ އަސާސީގެ ދަށުން ފުރަތަމަ އެކުލަވައިލި ކޮމިޝަނަށް 2008 ވަނަ އަހަރު އެެވެ.

އީސީގެ މެންބަރެއްގެ ގޮތުގައި ފުއާދު ހޭދަ ކުރެއްވި 10 އަހަރުގެ މުއްދަތުގައި އޭނާ ވަނީ އެ ކޮމިޝަނަށް ތެދުވެރިކަމާއި އިހުލާސްތެރިކަމާ އެކު ބުރަ މަަސައްކަތްތަކެއް ކޮށްދެއްވާފަ އެވެ. އަދި ގިނަ ބައެއްގެ އިތުބާރާއި ލޯބި މިލްކު ކޮށްގެން ހުންނެވި ބޭފުޅެއްވެސް މެއެވެ.