އޮޅުވެލިފުށީގައި ފެނާއި ނަރުދަމާ ނިޒާމް ގާއިމުކޮށް ނިންމައިފި

މި ސަރުކާރުން ފެނާއި ނަރުދަމާގެ ގިނަ މަޝްރޫޢުތަކެއްގެ މަސައްކަތް މިހާރުވެސް ކުރިއަށް ގެންދޭ

ޅ. އޮޅުވެލިފުށީގައި ފެނާއި ނަރުދަމާގެ ނިޒާމް ޤާއިމުކުރުމުގެ މަޝްރޫޢު ނިންމާލައިފިއެވެ.

މާލޭ ވޯޓަރ އެންޑް ސުވަރޭޖް ކޮންޕެނީ (އެމްޑަބްލިޔުއެސްސީ)ގެ މެނޭޖިން ޑިރެކްޓަރ ޢަބްދުލް މަޠީން މުޙައްމަދު ވިދާޅުވެފައިވަނީ މި މަޝްރޫޢުގެ މަސައްކަތްތައް ނިންމައި، ނިޒާމުތައް ޓެސްޓްކޮށް ނިމިފައިވާ ކަމަށެވެ.

ފެނުގެ ނިޒާމު ޤާއިމްކުރުމުގެ މަސައްކަތުގެ ދަށުން 9.71 ކިލޯ މީޓަރުގެ ދިގު ފެން ހޮޅީގެ މައި ނެޓްވޯކެއް އަޅައި، ފެން އުފެއްދުމަށް 2 އާރްއޯ ޕްލާންޓް ބަހައްޓާފައިވެއެވެ. އަދި މި ޕްލާންޓްތަކުން އުފައްދާ ފެން ރައްކާކުރުމަށް 3 ތާނގީ ބަހައްޓައި، ގޭގޭގައި ފެން މީޓަރުތައް ހަރުކޮށް ފެނުގެ ކަނެކްޝަން ގެތަކަށް ގުޅާފައިވެއެވެ.

ނަރުދަމާ ނިޒާމް ޤާއިމްކުރުމުގެ މަސައްކަތުގެ ދަށުން 6.56 ކިލޯމީޓަރުގެ ނަރުދަމާ ވިއުގައެއް ޤާއިމްކޮށް، 1.60 ކިލޯ މީޓަރުގެ ޕަންޕިން ލައިނެއް އަޅައި، އިދާރީ އިމާރާތެއް އަޅާފައިވެއެވެ. މީގެ އިތުރުން ރަށުގެ އެކި ސަރަހައްދުތަކުގައި 4 ޕަންޕިން ސްޓޭޝަން ބަހައްޓައި، ނަޖިސް ބޭރުކުރުމަށް 1 ސީ އައުޓް ފްލޯ ޤާއިމްކޮށްފައިވެއެވެ.

މި މަޝްރޫޢުގެ ޢަމަލީ މަސައްކަތް ފަށާފައިވަނީ 2021 ވަނަ އަހަރުގެ ޑިސެންބަރުމަހުގެ 18 ވަނަ ދުވަހުއެވެ. ސަރުކާރުން މި މަޝްރޫޢަށް 80 މިލިޔަން ރުފިޔާ ޚަރަދުކޮށްފައިވާއިރު، މި މަޝްރޫޢު ނިމުމުން އޮޅުވެލިފުށީގެ ރައްޔިތުންނަށް ރައްކާތެރި ފެނާއި ނަރުދަމާގެ ޚިދުމަތް ލިބިގެންދާނެއެވެ.

އެމްޑަބްލިއުއެސްސީ