މަހިބަދޫގައި 100 ހައުސިން ޔުނިޓް އެޅުމުގެ މަސައްކަތް އަންނަ އަހަރު ފައްޓާނަން: ރައީސް

އަންނަ އަހަރަކީ އދ. މަހިބަދޫގައި 100 ހައުސިން ޔުނިޓުގެ މަސައްކަތް ފަށާ އަހަރު ކަމުގައި ރައީސުލްޖުމްހޫރިއްޔާ ޑދ. މުޙައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ، އދ. އަތޮޅުގެ ބައެއް ރަށްރަށަށްކުރައްވަމުން ގެންދަވާ ދަތުރުފުޅުގައި، މަހިބަދޫ ރައްޔިތުންނާ މިއަދު ބައްދަލުކުރައްވައި ވާހަކަފުޅު ދައްކަވަމުންނެވެ.

އަންނަ އަހަރަށް ސަރުކާރުން ފާސްކުރައްވާފައިވާ ގެދޮރުވެރި ކަމުގެ ބަޖެޓަށް އިޝާރާތް ކުރައްވަމުން ރައީސް ވިދާޅުވީ، މިހާރު ވެސް ރަށުން ލިބެން އޮތް ބިމުގައި ހައުސިން ޔުނިޓު އެޅުމުގެ އަމަލީ މަސައްކަތް އަންނަ އަހަރު ފެށޭނޭ ކަމަށެވެ.

އޭގެ އިތުރުން މަހިބަދޫގެ އިހުތިސާސްގައި ހިމަނާފައިވާ މާފަރު ފަޅު ހިއްކައި ތަރައްގީ ކުރުމުގެ ކޮންސެޕްޓު ފަރުމާ ކުރުމުގައި ވެސް ރައްޔިތުންގެ ވިސްނުމާ އެއްގޮތަށް މަސައްކަތް ކުރައްވާނޭ ކަމުގެ ޔަގީންކަން ރައީސް ވަނީ ދެއްވާފަ އެވެ.

މަހިބަދޫއަކީ އާބަން ސެންޓަރެއްގެ ގޮތުގައި ތަރައްގީވުމުން، އެކަމުގެ ފައިދާ ލިބޭނީ ހަމައެކަނި ރަށުގެ ރައްޔިތުންނަށް ނޫން ކަމަށާއި، މުޅި ސަރަހައްދަށް އެ ފައިދާ ލިބޭނެކަން ފާހަގަކުރައްވަމުން ރައީސް ވަނީ، މާފަރު ފަޅަކީ، އާބަން ސެންޓަރުގެ ހަގީގީ މާނައިގައި ތަރައްގީ ވެގެންދާ ތަނަކަށް ވާނޭ ކަމުގެ ޔަގީންކަން ދެއްވާފަ އެވެ.

ރައީސް ވިދާޅުވީ މަހިބަދޫ ރައްޔިތުން ކަންބޮޑުވުން ފާއުޅު ކުރާ އުމްރާނީ ތަރައްގީގެ އިތުރުން، މާނަވީ ތަރައްގީ ގެނެސްދެއްވުމަށް، ކުރިއަށް އޮތް ހަތަރު އަހަރު ދުވަހުގެ ތެރޭގައި، މުހިންމު މަސައްކަތްތަކެއް ކުރައްވާނޭ ކަމަށެވެ.

މި ސަރުކާރުގެ ސިޔާސަތަކީ، ހަތަރު އަހަރުގެ ތެރޭގައި، ރަށުގެ ރައްޔިތުން ބޭނުންވާ ގޮތަށް ތަރައްގީގެ ކަންކަން ބައްޓަން ކުރުން ކަމަށްވެސް އެމަނިކުފާނު ވިދާޅުވި އެވެ.