ބުރިޖަށް އަރައި މަގު ބަންދު ކޮށްގެން މުޒާހަރާ ކުރި އިތުރު ޓެކްސީ ޑްރައިވަރެއް ހައްޔަރަށް

ޓެކްސީ ޑްރައިވަރުން ކުރި މުޒާހަރާގައި ހުޅުމާލެއިން މާލެ އަންނަން އޮންނަ ހައިވޭ ބަންދުކޮށް، އާންމު ދަތުރުފަތުރަށް ހުރަސް އެޅި މައްސަލާގައި އިތުރު ޓެކްސީ ޑްރައިވަރަކު ހައްޔަރުކޮށްފި އެވެ.

ހުޅުމާލޭގައި މިދިޔަ ބުދަ ދުވަހުގެ ރޭ ކުރި އެ މުޒާހަރާއިން ދެ ޑްރައިވަރަކު ވަނީ ކުރިން ހައްޔަރުކޮށްފަ އެވެ.

 އެއީ މއ. ވިރާހު، މުހައްމަދު ޝާމިން، 39 އާއި ލ. ދަނބިދޫ ސަންރޭ، އަހުމަދު ޝަބީން، 33 އެވެ.

އެ ދެ މީހުންނަށް ވެސް ވަނީ ފަސް ދުވަހުގެ މުއްދަތު ކޯޓުން ޖަހައިދީފަ އެވެ.

އެ މީހުން ބަންދު ކުރި މައްސަލަ އިއްޔެ ވަނީ ހައި ކޯޓުގައި އިސްތިއުނާފު ކޮށްފަ އެވެ.

ފުލުހުން މިއަދު ބުނީ، މިދިޔަ ބުދަ ދުވަހު ޓެކްސީ ޑްރައިވަރުން ކުރިއަށް ގެންދިޔަ އިހުތިޖާޖުގައި އާންމު ދަތުރުފަތުރަށް ހުރަސް އަޅައި މަގު ބްލޮކުކޮށް ފުލުހުންގެ ދައުރު އަދާ ކުރުމަށް ހުރަސް އެޅި މައްސަލައާ ގުޅުވައި ކޯޓު އަމުރެއްގެ ދަށުން އިއްޔެ ހައްޔަރު ކުރީ މއ. ނަހީދީމަންޒިލް/ މިސްބާހު ޝަރީފު (31އ)، ކަމަށެވެ.

ޓެކްސީ ޑްރައިވަރުން މުޒާހަރާ ކުރީ ކުންފުންޏަކާ ހަވާލު ކޮށްގެން ސަރުކާރުގެ ޓެކްސީ ލައިނެއް ތައާރަފު ކުރުމަށް ނިންމާފައި ވާތީ. އެކަމާ ދެކޮޅަށެވެ.