ސޫރިޔާގެ ހަމަޖެހުމަށް މަޝްވަރާ ކުރަން ބްލިންކަން ތުރުކީއަށް

ބްލިންކެން އާއި ތުރުކީގެ ރައީސް ރަޖަބް ޠައްޔިބް އުރުދުޣާން ބައްދަލުކުރައްވަނީ

އެމެރިކާގެ ޚާރިޖީ ވަޒީރު އެންތަނީ ބްލިންކެން، ސޫރިޔާގައި ހަމަޖެހުން ޤާއިމުކުރުމުގެ މަޝްވަރާތަކަށް ތުރުކީއަށް ވަޑައިގެންފިއެވެ.

މި ދަތުރުގައި ބްލިންކެން ވަނީ ތުރުކީގެ ރައީސް ރަޖަބް ޠައްޔިބް އުރުދުޣާނާ ބައްދަލުކުރައްވާފައެވެ.

ދެ ފަރާތުން ސޫރިޔާގެ މިހާރުގެ ހާލަތާމެދު މަޝްވަރާކުރެއްވިއެވެ. އުރުދުޣާން ގޮވާލެއްވީ ސޫރިޔާގެ މުއައްސަސާތައް އަލުން ބިނާކުރުމަށް ބައިނަލްއަޤްވާމީ މުޖުތަމަޢު ގުޅިގެން މަސައްކަތްކުރުމަށެވެ. އަދި ނިރުބަވެރި ޖަމާޢަތްތަކާ ދެކޮޅަށް މަސައްކަތްކުރުމުގައި ދެމިތިބޭނެކަމަށް އުރުދުޣާން ވިދާޅުވިއެވެ.

ބްލިންކެން ފާހަގަކުރެއްވީ ސޫރިޔާގައި އެންމެންގެ ބައިވެރިވުން އޮތް ޒިންމާދާރު އިންތިޤާލީ ސަރުކާރެއް ޤާއިމުކުރުމަށް ތުރުކީން ގެންގުޅޭ ވިސްނުން އެމެރިކާއިންވެސް ހިއްސާކުރާކަމަށެވެ. އަދި އައިއެސް ޖަމާޢަތް ބަލިކުރުމަށް ގުޅިގެން މަސައްކަތްކުރަންޖެހޭކަމަށްވެސް ވިދާޅުވިއެވެ.

ނަމަވެސް، ކުރުދީ ހަނގުރާމަވެރި ޖަމާޢަތްތަކާ ގުޅޭގޮތުން ދެ ޤައުމުގެ މެދުގައި ވަނީ ދެބަސްވުން އުފެދިފައެވެ. އެމެރިކާއިން ތާއީދުކުރާ އެސްޑީއެފްއަކީ ތުރުކީން ޓެރަރިސްޓް ޖަމާޢަތެއްކަމަށް ބަލާ ޕީކޭކޭގެ ގޮތްޕެއްކަމަށް ތުރުކީން ދެކެއެވެ.

އެމެރިކާ ސޫރިޔާ