ދިވެހި ސަފީރު ޑރ. އިރުތިޝާމް އިނގިރޭސި ރަސްގެފާނަށް ފަތްކޮޅު އެރުވައިފި

ސަފީރުކަމުގެ ފަތްކޮޅު އެރުވުން

ދިވެހިރާއްޖެއިން އިނގިރޭސިވިލާތަށް ކަނޑައަޅާފައި ހުންނަވާ ސަފީރު ޑރ. އިރުތިޝާމް އާދަމް، އެ ކަމަނާގެ ސަފީރުކަމުގެ ފަތްކޮޅު އިއްޔެ އިނގިރޭސިވިލާތުގެ ރަސްގެފާނު ޗާލްސް ތިންވަނައަށް އަރުވައިފިއެވެ.

ބަކިންހަމް ޕެލަސްގައި ބޭއްވުނު ރަސްމިއްޔާތުގައި ރަސްގެފާނު ޗާލްސް ވަނީ އިރުތިޝާމަށް މަރުހަބާ ވިދާޅުވެ، ދެ ގައުމުގެ ގުޅުން އިތުރަށް ބަދަހިކުރުމަށް ބޭނުންފުޅުވާ ކަމަށް ވިދާޅުވެފައެވެ. އިރުތިޝާމް ވަނީ ރައީސް މުއިއްޒުގެ ތަހުނިޔާ ރަސްގެފާނަށް އަރިސްކުރައްވައި، ދެ ގައުމުގެ މަސްލަހަތު ހިމެނޭ ދާއިރާތަކުން ގާތުން މަސައްކަތްކުރައްވާނެ ކަމުގެ ޔަގީންކަން އަރުވާފައެވެ.

ފަތްކޮޅު އެރުވުމުގެ ރަސްމިއްޔާތަށް ފަހު "ސެއިންޓް ޖޭމްސް ކޯޓް ލަންޑަން - އަ ތާޖް ހޮޓެލް" ގައި ޚާއްސަ ރިސެޕްޝަނެއް ބޭއްވުނެވެ. މި ރިސެޕްޝަނުގައި ކޮމަންވެލްތު ސެކްރެޓަރީ ޖެނެރަލްއާއި ސާކް އަދި ކޮމަންވެލްތު ގައުމުތަކުގެ ސަފީރުންނާއި އެހެނިހެން އިސް ބޭފުޅުން ބައިވެރިވެވަޑައިގެންނެވިއެވެ.

އިރުތިޝާމްގެ އަރިހުގައި ދިވެހި އެމްބަސީގެ އިސް ބޭފުޅުންނާއި އިނގިރޭސިވިލާތުގައި ދިރިއުޅޭ ބައެއް ދިވެހިން ވެސް މި ރިސެޕްޝަނުގައި ބައިވެރިވެވަޑައިގެންނެވިއެވެ.

ފޮރިން މިނިސްޓްރީ