މުޙައްމަދު އިސްމާޢީލްގެ މައްސަލަ ބަލައި ފިޔަވަޅު އަޅަން ގޮވައިލައިފި

ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ މެމްބަރުންނަކީ އިސްލާމްދީން ގަބޫލު ކުރާ ބައެއް ނޫން ކަމަށް ވިލިމާލެ ދާއިރާގެ މެންބަރު މުޙައްމަދު އިސްމާޢީލް ވިދާޅުވި މައްސަލަ ބަަލައި އެކަށީގެންވާ ފިޔަވަޅު އެޅުމަށް އެމްޑީޕީގެ ރައީސް އަބްދުﷲ ޝާހިދު ގޮވާލައްވައިފި އެވެ.

ރައީސް ޑރ. މުޙައްމަދު މުއިއްޒު އއ. ރަސްދޫގެ ރައްޔިތުންނާ ބައްދަލު ކުރެއްވި ޖަލްސާ ޖަލްސާ ޕީއެސްއެމުން ލައިވް ކުރިއިރު، ގުރުއާންގެ ކަލިމައެއް އުނިކޮށް ދެއްކުމުން ހުށަހެޅި ކުއްލި މައްސަލައިގެ ބަހުސްގައި މުޙައްމަދު އިސްމާޢީލް ވަނީ އެމްޑީޕީ މެމްބަރުންނަކީ އިސްލާމް ދީން ގަބޫލު ކުރާ ބައެއް ނޫން ކަމަށް ވިދާޅުވެފަ އެވެ.

އޭނާ ވިދާޅުވީ އެމްޑީޕީއަކީ ލާދިނީ ފިކުރުގެ ބައެއް ކަމަށެވެ.

"މިބޭފުޅުންނަކީ ކީރިތި ގުރުއާން ކީއްކުރަންތޯ އިސްލާމް ދީން ވެސް ގަބޫލުކުރާބައެއް ނޫން" މުޙައްމަދު އިސްމާޢީލް ވިދާޅުވި އެވެ.

މެމްބަރު އިސްމާޢީލްގެ ވާހަކަތައް ކުށްވެރިކުރައްވައި އަބްދުﷲ ޝާހިދު، ޓްވިޓާގައި ކުރެއްވި ޕޯސްޓުގައި ވަނީ އެމްޑީޕީ މެންބަރުންނަކީ އިސްލާމްދީން ގަބޫލު ކުރާ ބައެއްނޫން ކަމަށް ވިދާޅުވެ، މިއަދު ރައްޔިތުންގެ މަޖިލީހުގައި މުޙައްމަދު އިސްމާޢީލް ދެއްކެވި ވާހަކަ ކުށްވެރިކުރައްވާފަ އެވެ.

އޭނާ ވިދާޅުވީ ގާނޫނުއަސާސީގެ ނުވަ ވަނަ މާއްދާގައި ދިވެހި ރައްޔިތް ކަނޑައަޅައި ބަޔާންކޮށް، މުސްލިމަކަށް މެނުވީ ދިވެހިރައްޔިތަކަށް ނުވެވޭނެ ކަން ކަނޑައަޅައިފައި ވާތީ ކޮންމެ ދިވެހި ރައްޔިތަކީ ވެސް މުސްލިމެއް ކަމަށެވެ.

އޭގެ އިތުރުން ދިވެހިރާއްޖޭގެ ގާނޫނުލްއުގޫބާތުގެ 124 ވަނަ މާއްދާ ބުނާ ގޮތުން، މުސްލިމަކު ކަނޑައެޅިގެން ކުފުރުގެ ޢަމަލެއް ނުކުރާހާ ހިނދަކު އެމީހަކީ މުރުތައްދުވެފައިވާ މީހެއްގެ ގޮތުގައި ސިފަ ކުރުމަކީ ޖިނާއީ ކުށެއް ކަމަށް ޝާހިދު ވިދާޅުވި އެވެ.

ދިވެހިރާއްޖޭގެ ގާނޫނުލްއުގޫބާތުގެ 124 ވަނަ މާއްދާ ބުނާ ގޮތުން، މުސްލިމަކު ކަނޑައެޅިގެން ކުފުރުގެ ޢަމަލެއް ނުކުރާހާ ހިނދަކު އެމީހަކީ މުރުތައްދުވެފައިވާ މީހެއްގެ ގޮތުގައި ސިފަ ކުރުމަކީ ޖިނާއީ ކުށެއް ކަމަށާއި ދީނީ އެއްބައިވަންތަކަން ހިމާޔަތް ކުރުމުގެ ގާނޫނުގެ 35 ވަނަ މާއްދާގައިވާ ގޮތުން، ދިވެހި ރައްޔިތުންގެ ދީނީ އެއްބައިވަންތަކަން ނަގައިލުމަށް މަސައްކަތް ކުރުމާއި އެ ބާވަތުގެ ވާހަކަ ދެއްކުމަކީ މަނާ ކަމެކެއް ކަމުގައި ވެސް ޝާހިދު ވިދާޅުވި އެވެ.

އެމްޑީޕީ ސަރުކާރުގެ ފޮރިން މިނިސްޓަރުކަން ވެސް ކުރެއްވި ޝާހިދު ވިދާޅުވީ ދިވެހި ރައްޔިތުންގެ ތެރެއިން ގިނަ އަދަދެއްގެ ބަޔަކު ނިސްބަތްވާ ޕާޓީއެއްގެ މެމްބަރުންނަކީ، މުސްލިމުން ނޫން ކަމަށް ބުނުމަކީ ރައްޔިތުންގެ ތާއީދު ގެއްލި ސިޔާސީ ގޮތުން ބަލިވާން ފެށުމުން، އެކަން ފޫބެއްދުމަށް ޓަކައި ރައްޔިތުން ބައިބައި ކުރުމަށް ދީނީ ގޮތުން ފިތުނަ އުފެއްދުމަށް ފެށި ކަމެއް ކަމަށެވެ.

"ރައްޔިތުންގެ މަޖިލީހުގެ އިމްތިޔާޒާއި ސުލޫކު ކޮމިޓީން މި މައްސަލަ އަވަހަށް ބައްލަވައި، އެކަށިގެންވާ ފިޔަވަޅު އެޅުމަށް ގޮވައިލަން" ޝާހިދު ވިދާޅުވި އެވެ.