އަލިފާނާ ގުޅިގެން ހަތް ގޭބިސީއަކުން 29 މީހުން ވަގުތީ ހިޔާތަކަށް

ހައުސިން މިނިސްޓްރީގައި އަލިފާން ރޯވުމާ ގުޅިގެން ގެދޮރު ދޫކޮށްލަން ޖެހުނު މީހުން ވަގުތީ ހިޔާތަކަށްް ބަދަލު ކުރުމުގެ މަސައްކަތް ފަށައިފި އެވެ.

މިއަދު ހެނދުނު 6:30 ހާއިރު ހައުސިން މިނިސްޓްރީ ހިންގަމުން އަންނަ އިމާރާތުގެ ފުރަތަމަ ފަންގިފިލާގައި ރޯވި އަލިފާން، ފެތުރި އެ އިމާރާތް ވަނީ އަނދާ އަޅިއަށް ވެފަ އެވެ. އަދި އެންވަޔަރުމެންޓް މިނިސްޓްރީ ހިންގާ "ގްރީން ބިލްޑިން"އަށް އެ އަލިފާން ފެތުރި އެ އިމާރާތުގެ ބޮޑު ބައެއް ވެސް ވަނީ އަނދާފަ އެވެ.

މި ހާދިސާއާ ގުޅިިގެން އެ ސަރަހައްދާ ކައިރި ގެ ތަކުގައި ދިރިއުޅޭ މީހުންނަށް އެހީތެރިކަން ދިނުމުގެ ގޮތުން ސޯސަލް ސެންޓަރުގައި ވަނީ އިމަޖެންސީ އިވެކުއޭޝަން ސެންޓަރެއް ހަދައިފަ އެވެ.

މި ހާދިސާ ހިނގައިގެން އުޅު ވަގުތު އެ ސަރަހައްދުން ވަނީ މީހުން ހުސްކޮށްފަ އެވެ.

ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން ބުނީ، އަލިފާނުގެ ހާދިސާ ހިނގި ސަރަހައްދުގައި ހުރި ތިން އިމާރާތެއްގެ ހަތް ގޭބީސީއަކުން 29 މީހަކު ވަގުތީ ހިޔާ ތަކަށް ބަދަލު ކުރުމުގެ މަސައްކަތް މި ވަގުތު ކުރަމުން އަންނަ ކަމަށެވެ.

 އެއީ، 15 ފިރިހެނުންނާއި 14 އަންހެނުންނެވެ. ދުމުގެ އަސަރުކޮށްފައި ވަނީ މ. ލޯކަށިގެ އާއި މ. ކުދިމާވިލާ އަދި މ. ލޫބިޔާ އަށެވެ.

 އެންޑީއެމްއޭ އިން ކުރިން ބުނެފައިވާ ގޮތުގައި، އެހީތެރިކަން ބޭނުންވެގެން އެ އޮތޯރިޓީއަށް 50 ރިޕޯޓެއް ލިބިފައިވެ އެވެ.

މިހާރުވަނީ އެ ސަރަހައްދުގައި ރޯވެފައިއޮތް އަލިފާންގަނޑު ކޮންޓްރޯލުކޮށްފަ އެވެ.