އެފްއެސްއެމްގެ ތެލުގެ ކޮރަޕްޝަން: މާލިއްޔަތު ކޮމިޓީ ބައްދަލުވުން ސިއްރުކޮށްފި

ރައްޔިތުން މަޖިލިހުގެ މާލިއްޔަތު ކޮމެޓީ؟ ފޮޓޯ: މަޖިލިސް

ފިއުލް ސަޕްލައި މޯލްޑިވްސް (އެފްއެސްއެމް) ގެ ތެލުގެ ކޮރަޕްޝަނާ ގުޅިގެން އެސްޓީއޯއާ އެކު ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ބޭއްވި ބައްދަލުވުން ވަނީ ސިއްރުކޮށްފައެވެ.

މި ބައްދަލުވުން ސިއްރުކުރަން ހުށަހެޅުއްވީ ބާރަށު ދާއިރާގެ މެންބަރު އިބްރާހިމް ޝުޖާއު އެވެ.

މި ބައްދަލުވުން ބޭއްވުނީ އެފްއެސްއެމްގެ މުވައްޒަފުންތަކެއް އެ ކުންފުނީގެ ތެލުން ވައްކަންކޮށް، މަނީ ލޯންޑަރިންގ ކުރި މައްސަލައާ ގުޅޭގޮތުން އެސްޓީއޯގެ އިސް ބޭފުޅުންނާ މަޝްވަރާކުރުމަށެވެ. މިދިޔަ ހޯމަ ދުވަހުވެސް މާލިއްޔަތު ކޮމިޓީގައި މި މައްސަލައާ ގުޅޭގޮތުން މަޝްވަރާކޮށްފައިވެއެވެ.

މި މައްސަލާގައި އެފްއެސްއެމްގެ 10 މުވައްޒަފެއްގެ މައްސަލަ ފުލުހުން ގެންދަނީ ބަލަމުންނެވެ. އަދި މި މައްސަލާގައި ބައެއް ތަންތަން ވެސް ފުލުހުން ވަނީ ފާސްކޮށްފައެވެ.

މީގެ ކުރިން ވެސް މިފަދަ މައްސަލައެއް ވަނީ ފެންމަތިވެފައެވެ. މިދިޔަ ޖެނުއަރީ މަހު ފުލުހުން ބުނެފައިވާ ގޮތުގައި އެމްޕީއެލްއަށް ޑެލިވަރީ ނުކުރާ ތެޔޮތަކެއް އެމްޕީއެލްއަށް ލިބިފައިވާ ކަމަށް ދައްކައި، 119 ޑެލިވަރީ އޯޑަރަކަށް އެފްއެސްއެމްއަށް ފައިސާ ދޫކުރުމުން އެ ފައިސާއަށް ހިޔާނާތްތެރިވެފައިވާ ކަމަށް ތުހުމަތު ކުރެވޭ ހެކި ލިބިފައިވެއެވެ.

އޭރު ފުލުހުން ބުނެފައިވާ ގޮތުގައި އެމްޕީއެލްގައި މަސައްކަތްކުރާ މުވައްޒަފުންނާއި އެފްއެސްއެމްގައި މަސައްކަތްކުރާ މުވައްޒަފުންތަކެއް ގުޅިގެން 6.7 މިލިއަން ރުފިޔާއަށް ހިޔާނާތްތެރިވި ކަމަށް ތަޙުޤީޤަށް ވަނީ ހޯދިފައެވެ. މި މައްސަލަތަކާ ގުޅިގެން އިތުރު ތަޙުޤީޤުތައް ކުރިއަށްދާނެ ކަމަށް ބެލެވެއެވެ.

ރައްޔިތުންގެ މަޖިލިސް